कोलकाता: कोलकातास्थित आरजी कर मेडिकल कलेज एवं अस्पतालका ५० भन्दा बढी डाक्टरहरूले ८ अक्टोबरमा सामूहिक रूपमा आफ्नो पदबाट राजीनामा दिएका छन्। अस्पतालमा भएको दुष्कर्म र हत्याको न्यायको माग गर्दै अनिश्चितकालीन अनशनमा बसेका कनिष्ठ चिकित्सकको सुरक्षाको प्रत्याभूति गराउन यो कदम चालिएको छ।  ९ अगस्तमा अस्पतालमा एक जना जुनियर डाक्टरको मृत्यु भएपछि घटना भएको हो। चिकित्सकहरूले स्वास्थ्य तथा परिवार कल्याण विभागका सचिवलाई पत्र लेखेर सामूहिक राजीनामाको कारण बुझाएका छन्। उनीहरूले आफूले सधैं बिरामीलाई उत्कृष्ट स्वास्थ्य सेवा उपलब्ध गराउने प्रयास गरेको तर अहिलेको अवस्थाले आफ्नो कार्यकुशलतामा गम्भीर असर परेको बताए। पत्रमा अनशनमा बसेका चिकित्सकको स्वास्थ्य अवस्था नाजुक बन्दै गएको र सरकारले प्रभावकारी कदम चाल्न नसकेको समेत उल्लेख गरेको छ। आन्दोलनरत चिकित्सकहरुसँग तत्काल वार्ता गर्न चिकित्सकहरुले सरकारसँग आग्रह गरेका छन्। अस्पतालका वरिष्ठ चिकित्सकहरुले स्थिति सुधार नभए व्यक्तिगत रुपमा पनि राजीनामा दिन तयार रहेको स्पष्ट पारेपछि यो सामूहिक राजीनामा आएको छ। खासगरी सरकार र चिकित्सकबीच सहमति हुने सम्भावना नदेखिएपछि अस्पतालमा कार्यरत चिकित्सकको अवस्था तनावपूर्ण बनेको छ। अभयाको हत्या र दुष्कर्मको घटनामा न्याय नपाउँदा चिकित्सकमा आक्रोश र निराशा बढ्दै गएको छ। यस विषयमा सरकारको तर्फबाट अहिलेसम्म कुनै ठोस प्रतिक्रिया नआएपनि चिकित्सकहरुको सामूहिक राजीनामाले राज्यको चिकित्सा सेवामा गम्भीर प्रश्न खडा गरेको छ।