जलपाईगढी: जलपाईगढीमा लुटपाट घटनालाई रोक्न पुलिसमाथि गोली चलाउने तीन जनालाई पक्राउ गरिएको छ। पुलिसमाथि गोली प्रहार गरेको सीसीटीभी फुटेज सार्वजनिक भएको छ। पुलिसले तीन अपहरणकारीलाई पक्राउ गर्नुका साथै तीन वटा चार चक्के सवारीसाधन पनि नियन्त्रणमा लिएको छ। यो जलपाईगढी पुलिसको लागि ठूलो सफलता मानिएको छ। पुलिसले आरोपीलाई उत्तर प्रदेशबाट पक्राउ गरेको छ। पत्रकार सम्मेलनमा जलपाईगढी जिल्लाका पुलिस उपरीक्षक उमेश खाण्डाबहालेले पक्राउ पर्नेमा आशिष कुमार यादव, सेलिल खान र आशिष गिरी रहेको बताए। तीनै जना उत्तर प्रदेशका हुन्। शहर र आसपासका क्षेत्रमा लुटपाटका लागि तीनवटा सवारीसाधन प्रयोग भएको पुलिस उपरीक्षकले जानकारी दिए। घटनापछि सीसीटीभी क्यामेराको फुटेज संकलन गरी अनुसन्धान थालिएको छ। तर गोली प्रहार गर्ने अभियुक्त अझै पक्राउ परेका छैनन्। उनको खोजी भइरहेको छ। सीसीटीभी फुटेज हेरेर पुलिसले लुटपाटमा प्रयोग भएका तीनवटा चार  चक्के सवारीसाधन नियन्त्रणमा लिएर अनुसन्धान गरेको पुलिस उपरीक्षकले बताए।