दार्जीलिङ: दार्जीलिङ गोर्खा हिल स्पोर्ट्स एसोसिएशन (डीजीएचएसए)-को आयोजनमा जारी प्रतिष्ठित हर्ली मेमोरियल कप नक्आउट फूटबल टुर्नामेण्टको १०७औं संस्करणमा दार्जीलिङ पुलिसले फाइनलमा स्थान बनायो। लेबोंग स्थित गोर्खा स्टेडियममा बुधवार खेलिएको सेमिफाइनल म्याचमा दार्जीलिङ पुलिसले कालेबुङको हिमालश्री एथलेटिक क्लबलाई ५-०-ले पराजित गऱ्यो। विजेता टीमबाट सिद्धान्त छेत्रीले १७औं र ८३औं मिनटमा २ गोल गरे। यसबाहेक वांगचुक तामाङले २१औं, निहाल सेवाले ४०औं र आशिष देवानले ४१औं मिनटमा गोल गरे। आजको म्याचमा दार्जीलिङ पुलिसको टीमले विपक्षी टोलीलाई चल्मलाउने मौका दिएन। अब बिहीवार खेलिने फाइनलमा दार्जीलिङ पुलिस र १०७ टेरिटोरियल आर्मीबीच भिड़न्त हुनेछ।