ढाका: नोबेल पुरस्कार विजेता प्रोफेसर मोहम्मद युनुस (८४) को नेतृत्वमा रहेको बंगलादेशको अन्तरिम सरकारले बिहीबार सपथ लिने भएको छ। सेना प्रमुख जनरल वकार-उज-जमानले अन्तरिम सरकारले बिहीबार साँझ ८ बजे सपथ लिन सक्ने बताएका छन्। सल्लाहकार समितिमा १५ सदस्य हुन सक्छन्। राष्ट्रपति शहाबुद्दीनले अर्थशास्त्री युनुसलाई अन्तरिम सरकारको प्रमुखमा नियुक्त गरेका थिए। सेनाले अस्थायी रूपमा देशको नियन्त्रण लिएको छ, तर अन्तरिम सरकारमा यसले कस्तो भूमिका खेल्छ भन्ने स्पष्ट छैन। नयाँ निर्वाचनको घोषणा नभएसम्म युनुसले नेतृत्व सम्हाल्न सक्नेछन्।

शेख हसिनाको शासनकालमा हिनामिनाको आरोपमा उत्पीडन भोगेका युनुसले अब नेतृत्व सम्हाल्ने छन्। युनुस, पेशाले अर्थशास्त्री र ब्यांकर, गरिब मानिसहरू, विशेष गरी महिलाहरूलाई मद्दत गर्न माइक्रोक्रेडिटको प्रयोगमा अग्रगामी भूमिकाको लागि २००६ मा नोबेल शान्ति पुरस्कारबाट सम्मानित गरिएको थियो। युनुसले साधारणतया योग्य नहुने उद्यमीहरूलाई साना ऋण उपलब्ध गराउन सन् १९८३ मा ग्रामीण ब्यांकको स्थापना गरेका थिए। उनलाई ‘गरीब जनताको ब्यांकर’ पनि भनिन्छ। यद्यपि हसिनाले युनुसलाई ‘रक्त चुसाउने’ भनेकी थिइन् र ग्रामीण ब्यांकको प्रमुखका रूपमा गरीब ग्रामीण महिलाहरूबाट ऋण असुली गर्न बल र अन्य तरिकाहरू प्रयोग गरेको आरोप लगाएकी थिइन्। युनुसले यसअघि सन् २००७ मा राजनीतिक दल खोल्ने घोषणा गरेका थिए, तर गठन गरेका थिएनन्। युनुस हसिनाका कडा आलोचक हुन् र हसिनाको राजीनामालाई देशको ‘दोस्रो मुक्ति दिवस’ भनेर वर्णन गरेका छन्। हसिनाको सरकारले २०११ मा ब्यांकको गतिविधिको समीक्षा शुरु गर्यो, र सन् २०१३ मा सरकारी अनुमति बिना पैसा लिएको आरोपमा यो मुद्दा चलाइएको थियो। यस वर्षको शुरुमा बंगलादेशको एक विशेष न्यायाधीशको अदालतले युनुस र अन्य १३ विरुद्ध २० लाख अमेरिकी डलर हिनामिनाको मुद्दामा अभियोग लगाएको थियो।