नयाँ दिल्ली: बंगलादेशकी पूर्वप्रधानमन्त्री शेख हसिना भारतमै रहने कि अन्यत्र जाने योजना भन्ने बारेमा अहिले चर्चा चलिरहेको छl भारतीय विदेश मन्त्रालयले यस सम्बन्धमा अद्यावधिक जानकारी दिएको छ। विदेश मन्त्रालयका प्रवक्ताले बंगलादेशकी पूर्वप्रधानमन्त्री शेख हसिनाको भावी योजना के छन् भन्ने बारे अहिले नै कुनै जानकारी दिन नसकिने बताए। किनभने यो उनीहरूको काम हो। कहाँ जाने वा नजाने भन्ने निर्णय उनीहरूले गर्नुपर्छ। त्यसपछि भारत सरकारले निर्णय गर्नेछ। विदेश मन्त्रालयका प्रवक्ता रणधीर जैसवालले भने, ‘विदेशमन्त्री एस जयशंकरले संसदमा शेख हसिनालाई छोटो सूचनामा भारत भ्रमणको अनुमति दिइएको बताइसकेका छन्। अहिले मसँग उनीहरूको योजनाको बारेमा बताउन केही छैन। किनकी हरेक पल कुराहरु परिवर्तन भइरहेका छन्। केहि स्पष्ट हुने बित्तिकै, हामी तपाईंलाई पूर्ण जानकारी दिनेछौं।‘

रणधीर जैसवालले बंगलादेशको अवस्था हरेक पल परिवर्तन भइरहेको बताए। ‘हामी त्यहाँ शान्ति र सामान्यताको आशा गरिरहेका छौं, ताकि हामी बंगलादेशमा हाम्रा चासोहरू अगाडि बढाउन सकौं’, उनले भने। बंगलादेशमा करिब १९,००० भारतीय थिए, जसमा ९,००० विद्यार्थी थिए। अधिकांश विद्यार्थी स्वदेश फर्किएका छन्। धेरै भारतीयहरूले फर्कन मद्दतको लागि अनुरोध गरेका छन्। उनीहरुलाई सहयोग गर्न दूतावास हरेक पल तयार छ। विदेश मन्त्रालयका प्रवक्ताले बंगलादेशमा रहेका भारतीय उच्चायोग र भारतीय नागरिकको सुरक्षाका विषयमा बंगलादेश सरकारसँग वार्ता भइरहेको बताए।