झापा: मोरङ्गको लेटाङ नगरपालिका–१ कटहरे निवासी वर्ष ५३ का भिमबहादुर लिम्बुलाई छिमेकी हस्त बहादुर नाल्बो लिम्बुले धारिलो हतियार प्रहार गर्दा गम्भीर घाइते भएका छन्। घटनास्थलमा उपस्थित व्यक्तिहरूका अनुसार, आज बिहान दुई बीच जमिनको विषयमा विवाद भएपछि झगडा भएको थियो। विवादको क्रममा हस्त बहादुर लिम्बुले धारिलो हतियारले प्रहार गर्दा भिम बहादुरको बायाँ हातको पाखुरामा गहिरो चोट लागेको हो। घाइते भिम बहादुरलाई तत्कालै प्राथमिक स्वास्थ्य केन्द्र, लेटाङमा उपचारका लागि लगिएको छ।अस्पतालले घाईतेको अवस्था गम्भीर रहेको जानकारी दिएको छ। घटनापछि अभियुक्त लिम्बु फरार भएका छन्। प्रहरीले घटनास्थलमा उपस्थित सबै व्यक्तिहरूसँग बयान लिएको छ र अभियुक्तको खोजी तीव्र रूपमा भइरहेको जानकारी दिएको छ। प्रहरीको भनाइ अनुसार हस्त बहादुर लिम्बुको खोजी कार्यलाई थप तीव्रता दिनका लागि विभिन्न स्थानमा सर्च अपरेसन जारी राखिएको छ। घटनाको थप अनुसन्धान जारी रहेको प्रहरीले जानकारी दिएको छ।