दुधे: राई गाउँ फूटबल क्लब (आरजीएफसी)-को तत्त्वावधानमा आयोजित इण्डिपेण्डेन्स डे नक्आउट फूटबल टुर्नामेण्टमा ३/९ गोर्खा राइफल्स (जीआर) सालुगढ़ाले गोलको वर्षा गरेर प्री-क्वार्टर फाइनलमा स्थान बनायो। दुधे फूटबल मैदानमा शनिवार भएको म्याचमा ३/९ जीआर-ले मिरिक लेक फूटबल क्लबलाई १०-०-ले पराजित गऱ्यो। विजेता टीमबाट सुराराम तामाङ, मणि मल्ल र शिव सुवेदीले २-२ गोल गरे। यसबाहेक कृष्ण केसी, प्रवीण थापा, विशाल शाही र सुर्जे तामाङले १-१ गोल गरे। म्याचमा रेफरीको भूमिका मनदीप रिजालले निर्वाह गरेका थिए। यसरी सहायक रेफरीको भूमिकामा प्रवीण प्रधान र सुकराज राई थिए जबकि कुणाल छेत्री फोर्थ अफिसियल रहेका थिए। अब आइतवार खेलिने म्याचमा १४ इञ्जीनियर ३३ कर्प्स आर्मी र दुधे फूटबल एकाडमीबीच भिड़न्त हुनेछ। म्याच दिउँसो ३ बजीदेखि शुरु हुनेछ। यस सेभेन ए साइड फूटबल टुर्नामेण्टमा च्याम्पियन हुने टीमलाई आकर्षक ट्रफीको साथमा ५० हजार रुपियाँँको नगद पुरस्कार प्रदान गरिनेछ। यसरी रनरअप हुने टीमलाई आकर्षक ट्रफीको साथमा ३० हजार रुपियाँको नगद पुरस्कार प्रदान गरिनेछ। टुर्नामेण्टको दुईवटा सेमिफाइनल म्याच १० र ११ अगस्तमा हुनेछ। यसरी फाइनल १५ अगस्तमा खेलिनेछ भनी आयोजक समितिको पक्षमा विशाल सुब्बाले जानकारी दिएका छन्।