खोरीबारी: ग्राम पञ्चायतले बनाएको आधा पूरा भएको सेफ्टी ट्याङ्कीमा खसेर डेढ वर्षीय बालकको मृत्यु भएको छ। घटना खोरीबारीको देबुराम जोतमा भएको हो। घटनापछि सो क्षेत्रमा शोकको वातावरण छ। प्राप्त जानकारीका अनुसार शुक्रबार दिउँसो डेढ वर्षीय समीर आफ्नी आमासँग खेलिरहेका थिए। खेल्दै गर्दा अचानक समीर आधा पूरा भएको सेफ्टी ट्याङ्कीमा खसेका थिए। समीरकी आमाले नदेखेपछि उसलाई खोज्न थालिन्। त्यसपछि समीर खाडलमा बेहोस अवस्थामा फेला परेका थिए। उनलाई उपचारका लागि प्राथमिक स्वास्थ्य केन्द्र बतासी पुर्याइए पनि त्यहाँका चिकित्सकले मृत घोषणा गरेका थिए। आधा सकिएको सेफ्टी ट्याङ्कीको काम सकिएको भए यस्तो घटना नआउने स्थानीयले बताएका छन्।