बारी: इटालीका प्रधानमन्त्री जर्जिया मेलोनीले भर्खरै सम्पन्न जी-७ शिखर सम्मेलनमा प्रधानमन्त्री नरेन्द्र मोदीसँगको सेल्फी भिडियो सेयर गरेकी छन्। प्रधानमन्त्री मोदीसँगको आफ्नो मित्रता व्यक्त गर्दै मेलोनीले यस भिडियोको शीर्षक ‘नमस्ते साथीहरू, मेलोडीको तर्फबाट’ राखेकी छिन्। प्रधानमन्त्री मोदीको दक्षिणी इटालीको अपुलियाको एकदिवसीय भ्रमणको अन्त्यमा शुक्रबार दुई नेताबीच भेटवार्ता भएको हो। यस क्रममा मोदीले मेलोनीलाई जी-७ शिखर सम्मेलनमा भाग लिन आमन्त्रित गरेकोमा धन्यवाद दिए। ऐतिहासिक तेस्रो कार्यकालका लागि प्रधानमन्त्री बनेपछि उनको यो पहिलो विदेश भ्रमण हो।

पाँच सेकेन्डको यो भिडियो मेलोनीले शनिबार आफ्नो ‘एक्स’ अकाउन्टमा सेयर गरेकी हुन्। देशकी प्रथम महिला प्रधानमन्त्री मेलोनी (४७)ले भिडियोमा भनिन्, ‘मेलोडी टोलीबाट नमस्कार।’ भिडियोमा ७३ वर्षीय मोदी हाँसेको देखिन्छ। यस भिडियोमा मेलोनीले भनेकी छन् कि मेलोनीको मेल र मोदीको ओडी सँगै #मेलोडी बनेको छ जसले भारत र इटालीको मित्रतालाई देखाउँछ। भिडियोलाई रि-सेयर गर्दै प्रधानमन्त्री मोदीले लेखेका छन्, ‘भारत र इटालीबीचको मित्रता कायम रहोस्!’ शुक्रबार यहाँ भएको द्विपक्षीय वार्तामा दुई नेताले द्विपक्षीय रणनीतिक साझेदारीको प्रगतिको समीक्षा गरेका थिए। प्रधानमन्त्री मोदीले ‘एक्स’ मा लेखेका थिए, ‘प्रधानमन्त्री जर्जिया मेलोनीसँग धेरै राम्रो भेट भयो।’ भेटपछि मोदीले भनेका थिए, ‘हामीले वाणिज्य, ऊर्जाको क्षेत्रमा भारत-इटाली सम्बन्धलाई अझ बलियो बनाउने उपायहरूबारे छलफल गर्यौं। रक्षा, दूरसञ्चार आदिमा छलफल भयो। दुवै देशले जैविक इन्धन, खाद्य प्रशोधन र महत्वपूर्ण खनिज जस्ता क्षेत्रमा मिलेर काम गर्नेछन्।‘