गान्तोक: मुख्यमन्त्री प्रेमसिंह तामाङले ‘तारा: द लस्ट स्टार’ फिल्म निर्माण गर्ने सम्पूर्ण टोलीलाई हार्दिक बधाई दिएका छन्। सिक्किमले यस फिल्मको माध्यमद्वारा प्रतिष्ठित कान्स इन्टरनेशनल फिल्म फेस्टिभल २०२४ मा डेब्यु गरिरहेको बताउॅंदै उनले यसलाई उल्लेखनीय उपलब्धी बताएका छन्।

मुख्यमन्त्री तामाङले आज आफ्नो आधिकारिक फेसबुक पेजमा यस फिल्मलाई जीवन्त बनाउन संलग्न निर्देशक, निर्माता र सबै व्यक्तिहरूको सराहना गरेका छन्। उनले पासाङ मिन्टोक फिल्म्स र सादा प्रोडक्सनको लगनशीलता, समर्पण र दूरदृष्टिको पनि प्रशंसा गरेका छन्। उनले यो कोसेढुङ्गा हाम्रो क्षेत्रको इतिहासमा महत्त्वपूर्ण क्षण मात्र होइन, तर हाम्रो जीवन्त संस्कृति र हिमालयका समृद्ध कथाहरूलाई पनि देखाउँछ भनी बताएका छन्। उनले भनेका छन्, नेपाली भाषाको सामाजिक नाटक ‘तारा: द लस्ट स्टार’ ले आफ्नो आकर्षक कथाले विश्वभरका दर्शकहरूलाई मोहित बनाउने वाचा गर्छ।

उनले भनेका छन्, यो उपलब्धि हाम्रा फिल्म निर्माता र कलाकारहरूको प्रतिभा, समर्पण र लगनशीलताको प्रमाण हो। ‘तारा: द लस्ट स्टार’ ले हाम्रो फिल्म उद्योगको लागि प्रकाशको रूपमा काम गर्छ र सिक्किमको रचनात्मक भावनालाई उज्यालो बनाउँछ। मुख्यमन्त्रीले यो महत्त्वपूर्ण अवसरको उत्सवमा एकजुट होऔं र हाम्रा फिल्म निर्माताहरूलाई उनीहरूको कलाको माध्यमबाट प्रेरणा र उत्थानको रूपमा समर्थन गर्न जारी राखौं भनी आह्वान गरेका छन्।