नयाँ दिल्ली: देशमा लोकसभा चुनावको तेस्रो चरणको मतदान भएको छ। आज देशका ११ राज्य र केन्द्र शासित प्रदेशका ९३ सिटका लागि मतदान भएको छ। प्रधानमन्त्री मोदी र गृहमन्त्री अमित शाहले पनि आज भोट हालेका छन्। कुल ९३ सिटका लागि १३ सय उम्मेदवार प्रतिस्पर्धामा छन्, जसमध्ये १२० महिला छन् भने योग्य मतदाताको संख्या ११ करोडभन्दा बढी छ। यी ९३ सिटमा गएका दुई चुनावमा कांग्रेसको प्रदर्शन निकै खराब रह्यो र ८ सिटभन्दा बढी जित्न सकेको छैन। यी सिटमा भाजपाले आफ्नो वर्चस्व कायम राखेको छ।

लोकसभा चुनावको तेस्रो चरणअन्तर्गत बिहान ९ बजेसम्म १०.८१ प्रतिशत मतदान भएको छ। निर्वाचन आयोगले बिहान ९ बजेसम्म जारी गरेको तथ्यांकअनुसार असममा १०.१२ प्रतिशत, बिहारमा १०.४१ प्रतिशत, छत्तीसगढमा १३.२४ प्रतिशत, दादरा र नगर हवेली र दमन र दीवमा १०.१३ प्रतिशत, गोवामा १३.०२ प्रतिशत, गुजरातमा ९.८७ प्रतिशत मत परेको छ। कर्नाटकमा उत्तर प्रदेशमा ९.४५ प्रतिशत, मध्य प्रदेशमा १४.४३ प्रतिशत, महाराष्ट्रमा ६.६४ प्रतिशत, उत्तर प्रदेशमा १२.९४ प्रतिशत र पश्चिम बंगालमा १५.८५ प्रतिशत मतदान भएको थियो। प्रधानमन्त्री नरेन्द्र मोदीले अहमदाबादको रानीपमा रहेको मतदान केन्द्रमा मतदान गरेका छन्। मतदान स्थलमा उनीसँगै गृहमन्त्री अमित शाह पनि उपस्थित थिए।