गान्तोक: गत वर्ष ४ अक्टोबरको राति उत्तर सिक्किमको टिस्टा नदीमा आएको बाढीका कारण भत्केको टुङ पुलको पुनर्निर्माण हुनसकेको छैन। जसका कारण नागा हुँदै चुङथाङ जाने सडक स्थायी रुपमा जोडिन सकेको छैन। यस्तो अवस्थामा टुङलाई चुङ्थाङसँग जोड्ने अस्थायी काठको पुल जडान गर्ने काम भइरहेको छ। त्यो पनि केही दिनयता टिस्टा नदीमा आएको बाढीका कारण काठको पुल भाँचिएको थियो। जसको पुनर्निर्माणका लागि नर्थ सिक्किम टुरिस्ट ड्राइभर वेलफेयर एसोसिएसनको पहलमा आज टिस्टा नदीमा पुल निर्माण गरिएको हो।

यसले पर्यटक र आम जनतालाई उत्तर सिक्किम जान ठूलो सुविधा हुनेछ। संघले पुल निर्माणका लागि सबै खर्च र स्रोतको व्यवस्था गरेको छ। यसमा नागा गाउँका जनताले खुलेर सहयोग गरेका छन्। संघका सहसचिव चन्द्रमणि दर्जीले पुल निर्माण प्रक्रियामा भएको ढिलाइका कारण भइरहेको समस्यालाई मध्यनजर गर्दै गाउँले र संस्थाले पुल निर्माणको बिडा उठाएको बताए। यसमा लागेको सबै खर्च अनि संसाधनहरू एसोसिएशनले जुटाएको तथा गाउँलेहरूले सक्दो सहयोग पुऱ्याएको बताए।  हालै खोलामा आएको बाढीका कारण पुरानो काठको पुल भत्किए पछि धेरै सास्ती खप्नु परिरहेको उनले बताए।