झापा, (नेपाल): मलामीका लागि निःशुल्क रूपमा सञ्चालित साधनलाई मोरङ जिल्लाको विराटनगर महानगरपालिकाले इन्धन उपलब्ध गराउने भएको छ। विराटनगरका युवा करिम अन्सारीले मलामीका लागि निःशुल्क रूपमा उपलब्ध गराउँदै आएको सबारी साधनका लागि महानगरले इन्धन उपलब्ध गराउने भएको हो। विराट सेवा आश्रमसंगको सहकार्यमा विराटनगर वार्ड न०  १० ले अन्सारी र ज्येष्ठ नागरिकको हिजो शनिबार सम्मान गरेको थियो। सो सम्मान कार्यक्रममा बोल्दै विराटनगर महानगरपालिका प्रमुख नागेश कोइरालाले मलामीका लागि सञ्चालित सबारी साधनलाई मासिक इन्धन उपलब्ध गराउने घोषणा गरेका हुन्।

उनले भने, ‘यस्तो पवित्र कार्यमा महानगरपालिका पनि सहभागी हुन चाहन्छ। बसका लागि आवश्यक पर्ने इन्धन महानगरपालिकाले मासिक रूपमै उपलब्ध गराउने छ।‘ महानगरले १९ वटै वार्डमा घरघर पुगेर ज्येष्ठ नागरिकको स्वास्थ्य जाँच गर्नुका साथै निःशुल्क औषधीसमेत वितरण गर्दै आएको छ। ज्येष्ठ नागरिकलाई सो अवसरमा कम्बल, छाता, हर्लिक्स, फलफूल प्रदान गरेर सम्मान गरिएको थियो। वार्डभित्र बसोबास गर्ने एक सय जनालाई सम्मान गरिएको वार्ड अध्यक्ष अर्जुन गिरीले जानकारी दिए। कार्यक्रममा सम्मानित अन्सारीले ज्येष्ठ नागरिकलाई धार्मिकयात्रामा जानका लागि समेत निःशुल्क बस सेवा उपलब्ध गराउँदै आएका छन्।