मुम्बई: सलमान खानको घर बाहिर गोली चलाएको विषयमा खुलासा भएको छ। एक वरिष्ठ पुलिस अधिकारीले मंगलबार (१६ अप्रेल) मा पक्राउ परेका दुईजनाले गोली चलाउनअघि तीन पटक सलमान खानको घर वरिपरि रेकी गरेको बताए। दुवै अभियुक्तको पहिचान बिहार निवासी विक्की गुप्ता (२४ वर्ष) र सागर पाल (२१ वर्ष) भएको छ। आइतबार बिहान बान्द्रा क्षेत्रस्थित ग्यालेक्सी अपार्टमेन्टमा रहेको अभिनेताको घरबाहिर गोली चलाएपछि दुवै जना फरार भएका थिए। पुलिसले आफ्नो बयानमा भनेअनुसार, आरोपीहरूलाई सोमबार राति गुजरातको कच्छ जिल्लाको माता नो मध गाउँबाट पक्राउ गरियो। घटनाका बेला विक्कीले मोटरसाइकल चलाइरहेको पुलिस अधिकारीले बताए। यसैबीच पछाडि बसेका सागरले सलमान खानको घरमा गोली हानेको आरोप छ। मुम्बईका पुलिस सहआयुक्त (अपराध) लख्मी गौतमले पत्रकार सम्मेलनमा दुवै जनालाई मंगलबार बिहान उडानमा मुम्बई ल्याइएको जानकारी दिए। स्वास्थ्य परीक्षणपछि अदालतमा पेश गरिएको उनले बताए। त्यसपछि दुवैलाई २५ अप्रेलसम्म पुलिस हिरासतमा पठाइएको छ।

अधिकारीका अनुसार, आइतबार आरोपीले पाँच राउण्ड फायर गरेका थिए जसमध्ये एउटा पर्खालमा र अर्को सलमान खानको घरको ग्यालरीमा लागेको थियो। घटनाको अनुसन्धानका क्रममा गोली चलाएको जिम्मेवारी लिएको फेसबुक पोस्ट पनि बाहिर आएको छ। पुलिसका अनुसार यो पोस्ट जेलमा रहेका गुण्डा नाइके लरेन्स बिश्नोईका भाई अनमोल बिश्नोईले अपलोड गरेको कथित छ। यस विषयमा कारबाही गर्दै पुलिसले अनमोलविरुद्ध मुद्दा दर्ता गरेको छ। यसअघि कच्छ-पश्चिमका उपमहानिरीक्षक महेन्द्र बगाडियाले आफ्नो विज्ञप्ति जारी गर्दै प्रारम्भिक अनुसन्धानबाट सागर र विक्की दुवैलाई लरेन्स बिश्नोईको गिरोहले गोली चलाउनको लागि भाडामा लिएको बताएको थियो। बगडियाका अनुसार सागरले खानको घरमा गोली चलाउँदा विक्की गिरोहका सदस्यहरूसँग सम्पर्कमा थिए। दुवैले अपराध स्वीकार गरिसकेको उनले बताए।