लण्डन: ईंग्लिश प्रीमियर लीग फूटबल प्रतियोगितामा गत सीजनको च्याम्पियन म्यानचेष्टर सिटीले सजिलै जीत हासिल गरे पनि टोटनह्याम हट्स्परले चाहिँ निराशाजनक हारको सामना गर्नु पऱ्यो। म्यानचेष्टर युनाइटेड पनि निराशाजनक ड्र-मा रोकियो। म्यानचेष्टर सिटीले दोस्रो हाफको खेलमा गोलको वर्षा गर्दै लुटोन टाउनलाई ५-१-ले पिट्यो। आफ्नो होम ग्राउण्डमा ७४ प्रतिशत पोजेशनको साथ खेल्ने सिटी मध्यान्तरसम्म १-०-ले अघि थियो तर उनीहरूले दोस्रो हाफमा ४ गोल थपेर विपक्षी टीमको चुनौतीलाई माटोमा मिलाए। लुटोन टाउनका डिफेण्डर डाइकी हाशिओकाले दोस्रो मिनटमा आत्मघाती गोल गर्दा सिटीले शुरुमै बढ़त हासिल गऱ्यो। त्यसपछि मातेओ कोवासिचले ६४औं, एर्लिंग हालाण्डले ७६औं (पेनल्टी), जेरेमी डोकुले ८७औं र जोसको ग्वार्डिओलले इञ्ज्युरी टाइमको तेस्रो मिनटमा गोल गरी सिटीलाई एकतर्फी जीत दिलाए। यसरी लुटोन टाउनबाट रोस बार्कलेले ८१औं मिनटमा गोल गरे। यस जीतपछि सिटी ३२ वटा म्याचमा ७३ पोइण्ट्सको साथ प्रीमियर लीग पोइण्ट्स टेबलको शीर्ष स्थानमा पुग्यो।
यसबीच शीर्ष चारमा कायम रहने लक्ष्य लिएर खेलिरहेको टोटनह्यामले चाहिँ न्यूक्यासल विरुद्ध ०-४-ले हारको सामना गर्नु पऱ्यो। यस अवे म्याचमा ७३ प्रतिशत पोजेशनको साथ खेले पनि टोटनह्यामले गोल गर्न सकेन। न्यूक्यासलबाट एलेक्जेण्डर इसाकले ३०औं र ५१औं मिनटमा २ गोल गरे। यसबाहेक एन्थोनी गोर्डनले ३२औं र फेबिएन स्चारले ८७औं मिनटमा गोल गरे। यस म्याचमा हारपछि टोटनह्याम ६० पोइण्ट्सको साथ गोल अन्तरको आधारमा एस्टन भिल्लापछि पाँचौं स्थानमा रहन पुग्यो। यसरी छैटौं स्थानमा रहने न्यूक्यासलसँग ५० पोइण्ट्स रहेको छ। म्यानचेष्टर युनाइटेडले पनि बोर्नमाउथ विरुद्ध जसोतसो २-२-ले ड्र खेल्यो। प्रदर्शनमा निरन्तरताको कमीसँग जुझिरहेको युनाइटेडबाट दुवै गोल ब्रूनो फर्नाण्डेजले छिराए। उनले ३१औं र ६५औं मिनटमा गोल गरे। यसरी बोर्नमाउथबाट डोमिनिक सोलांकेले १६औं र जस्टिन क्लुइभर्टले ३६औं मिनटमा गोल गरे। म्यानचेष्टर युनाइटेड ५० पोइण्ट्सको साथ सातौं स्थानमा रहेको छ जबकि १२औं स्थानमा रहने बोर्नमाउथसँग ४२ पोइण्ट्स रहेको छ। प्रीमियर लीगका अन्य एउटा म्याचमा ब्रेण्टफोर्डले शेफील्ड युनाइटेडलाई २-०-ले पराजित गऱ्यो। यसरी नटिंघम फरेष्ट र वूल्भ्सबीच म्याच २-२ अनि बर्नले र ब्राइटनबीचको म्याच १-१-ले ड्र रह्यो।