चेन्नई: तमिलनाडुमा एउटा सुगाले एनडीए गठबन्धन उम्मेदवारको जितको भविष्यवाणी गरेपछि, यसको मालिक एक ज्योतिषीलाई पुलिसले पक्राउ गरेको समाचार अघि आएको छ। केही समयपछि चेतावनी दिएर रिहा भएका ज्योतिषको नाम सेल्वराज बताइएको छ। वन विभागले अब सुगाक मालिकलाई जरिवाना गर्ने तयारी गरेको छ। सेल्वराजको पाल्तु सुताले कुड्डालोर निर्वाचन क्षेत्रबाट एनडीए गठबन्धनको उम्मेदवारको जितको भविष्यवाणी गरेको थियो। ज्योतिषीलाई सुगालाई फेरि नराख्न चेतावनी पनि दिइएको छ। यस कारबाहीपछि पीएमकेले डीएमकेलाई निशाना बनाएको छ, र यसलाई हारको निराशा भनेको छ। यो घटना आइतबार ७ अप्रेलमा भएको थियो।

संचारमाध्यमको समाचारअनुसार, यो घटना कोड्डालोर जिल्लामा भएको हो। यहाँबाट फिल्म निर्देशक थन्कर बचन एनडीए गठबन्धनमा रहेको पट्टाली मक्कल काची (पीएमके) पार्टीबाट लोकसभा चुनावमा उम्मेदवार छन्। आइतबार उनी साथीभाईसँग प्रचारप्रसार गरिरहेका थिए। यसै क्रममा उनले आफ्नो निर्वाचन क्षेत्रमा रहेको मन्दिरको दर्शन गरे। दर्शन गरेर मन्दिरबाट बाहिर निस्कदै गर्दा सिँढीको छेउमा सेल्वराज भनिएका ज्योतिषीलाई देखे। ज्योतिषीले मन्दिर बाहिर सुगाबाट मानिसको भविष्य बताउन सक्ने दाबी गरिरहेका थिए।

थन्कर बचन केही बेर ज्योतिषसँग बसे। उनले सुगालाई आफ्नो भविष्यको बारेमा सोधे। ज्योतिषीले सुतालाई बाहिर निकाले र बाहिर राखिएका धेरै कार्डहरू मध्ये एउटा छान्न भने। सुगाले उठाएको कार्डमा मन्दिरको देवताको फोटो छापिएको थियो। यही कार्डका आधारमा ज्योतिषी सेल्वराजले थन्कर बचनलाई चुनावमा आफ्नो जितको संकेत मानेका थिए । थन्कर बचनले खुसीसाथ सुगालाई केरा खुवाए। उनका सहकर्मीले यो पूरै घटनाको भिडियो पनि बनाएका थिए जुन केही समयपछि सामाजिक संजालमा भाइरल भयो।

भिडियो भाइरल भएको केही समयपछि पुलिस सुगा मालिकसम्म पुगेको बताइएको छ। ज्योतिषी सेल्वराज र उनका भाईलाई पुलिसले नियन्त्रणमा लिएको छ। सेल्वराजको खोजी गर्दा उनीसँगै अरु केही सुगा पनि भेटिए। वन विभागको टोलीले ती सबै सुगालाई आफ्नो नियन्त्रणमा लिएर जंगलमा छाडेको थियो। पुलिसले पछि सेल्वाराज र उनका भाई श्रीनिवासनलाई रिहा गर्यो र सुगालाई फेरि कैदमा नराख्ने चेतावनी दिए। तर, वन विभागले अब ज्योतिषीलाई जरिवाना लगाउने तयारी गरेको छ। वन विभागका रेन्जर जे रमेशले दोषीलाई वन्यजन्तु संरक्षण ऐन, १९७२ अनुसार कारबाही गरिने बताए।