कोलकाता: वीरभूम जिल्लाको लोकपुर पुलिस थानाले ठूलो परिमाणमा देशी मदिरासहित दुई जनालाई पक्राउ गरेको छ। आसन्न लोकसभा चुनावको मिति घोषणा हुनुअघि नै झारखण्डसँग सीमा जोडिएको वीरभूम जिल्लाको पुलिस थाना क्षेत्रमा पुलिसको निगरानी बढाइएको छ। साथै नाका चेकिङको पनि अनुसन्धान भइरहेको छ। झारखण्डको सीमा क्षेत्रमा कुनै पनि गैरकानूनी गतिविधि हुन नदिन पुलिस प्रशासन सजग छ। लोकपुर थानाको धसुनिया नाकामा चेकजाँचको क्रममा बुधबार राति २० लिटर मदिरासहित एक जनालाई लोकपुर पुलिसले पक्राउ गरेको छ। पक्राउ पर्नेको नाम विश्वजित उर्फ कुश मण्डल रहेको बताइएको छ । घर झारखण्डको बागदोहरी थानाको मुरबेरिया गाउँका बासिन्दा हुन्। पक्राउ परेका व्यक्तिको खोजीमा पुलिसले रुपुशपुर क्षेत्रको खरबोना गाउँमा छापा मारेर २० लिटर देशी मदिरासहित रूपलाल दास नाम गरेका एक व्यक्तिलाई पक्राउ गरेको छ। पुलिस थाना लोकपुरले गरेको विशेष अभियानअन्तर्गत एक साताभित्रै एक मोटरसाइकल र करिब एक सय लिटर मदिरा बरामद गरेको छ। साथै विभिन्न स्थानबाट चार तस्करलाई पनि नियन्त्रणमा लिएको पुलिस स्रोतले जनाएको छ।