जलपाईगुडी: गर्मी शुरु भएसँगै जलपाईगुडीमा फेरि पानीको कोलाहल शुरु भएको छ। खानेपानीको अभाव भएपछि स्थानीय बासिन्दाले खानेपानीको माग गर्दै पानीका ड्रम, बाल्टिन, भाँडा र गाडा बोकेर सडक अवरुद्ध गरेर विरोध प्रदर्शन गर्न थालेका छन्। लोकसभाको मतदानलाई लिएर चलिरहेको हंगामाका बीच विभिन्न किसिमका आन्दोलनका कारण प्रशासन अन्योलमा परेको छ। जनताले सोमबार एलआरपी जंक्शन नजिकको क्षेत्रमा बनेरहाटदेखि चाल्सा जाने राष्ट्रिय राजमार्ग अवरुद्ध गरी विरोध जनाएका छन्। बनेरहाटमा पिउने पानीको माग गर्दै प्रदर्शन शुरु गरेका छन्। पानीका ड्रम, बाल्टिन, भाँडाकुँडा बोकेर सडक अवरुद्ध गर्दै आन्दोलनका कारण सवारी आवागमन ठप्प भएको छ। घरघरमा खानेपानी पुर्‍याउने पार्टीलाई भोट दिने स्थानीयले बताएका छन्। आन्दोलनकारीले केही महिनादेखि नियमित खानेपानी नपाएको गुनासो गरेका छन्। प्रशासनलाई पटकपटक आग्रह गर्दा पनि खानेपानीको समस्या समाधान नभएको आरोप छ। भोटअघि वाचा मात्रै गरिन्छ, भोटपछि पूरा हुँदैन, त्यसैले आज सडक अवरुद्ध गरेर विरोध प्रदर्शन भइरहेको छ। घरघरमा खानेपानी पुर्‍याउने पार्टीलाई भोट हाल्ने उनीहरुको माग छ ।लामो समयसम्म सडक अवरुद्ध हुँदा राष्ट्रिय राजमार्गका दुवैतर्फ सवारी जाम भएको थियो। सूचना पाएपछि बनेरहाट पुलिस स्टेशन र ब्लक प्रशासनका अधिकारीहरू घटनास्थलमा पुगेका थिए। प्रशासनको आश्वासनपछि आन्दोलनकारीले जाम हटाएका थिए । तर, खानेपानीको समस्या छिट्टै समाधान नभए ठूलो आन्दोलन गर्ने चेतावनी दिएका छन्।