गाजाको दक्षिणी भागमा रहेको रफाहमा जारी इजरायली आक्रमणले नरसंहार निम्त्याउन सक्ने राष्ट्र संघका एक शीर्ष अधिकारीले चेतावनी दिएका छन्। मानवीय प्रमुख मार्टिन ग्रिफिथ्सले गाजामा प्यालेस्टाइनीहरूले पहिले नै अतुलनीय तीव्र, क्रूर आक्रमणको सामना गरिरहेको बताए। ‘राफाहमा भएको आक्रमणको परिणाम विनाशकारी हुनेछ’, उनले भने। इजरायलका प्रधानमन्त्री बेन्जामिन नेतन्याहुले हमास लडाकुलाई परास्त गर्ने वाचा गरेका छन्। उनीहरू शहरमा लुकेर बसेको बताउँछन्। ग्रिफिथले कठोर शब्दमा भने, ‘१० लाख भन्दा बढी मानिस राफाहमा फसेका छन् र मृत्युको सामना गरिरहेका छन्l’ उनले शहरमा खानेकुरा वा औषधिको पहुँच निकै कम भएको र कतै जान सुरक्षित नभएको बताए। “यहाँ इजरायली आक्रमणले पहिले नै कमजोर मानवीय सहायता अभियानलाई ध्वस्त पार्नसक्छ’, उनले भने। राफाह इजिप्टको सिमानामा रहेको गाजा पट्टीको दक्षिणमा अवस्थित एउटा सहर हो। युद्ध सुरु हुनु अघि यहाँ करिब २.५ लाख जनसंख्या थियो। यद्यपि, जब इजरायलले नागरिकहरूलाई धेरै क्षेत्रहरू खाली गर्न आदेश दियो, जनसंख्या बढेर १५ लाख भयो। धेरै मानिसहरु धेरै खराब अवस्थामा यहाँ पालमा बसिरहेका छन्। हालैका दिनहरूमा इजरायलले रफाहमा आक्रमणलाई तीव्र पारेको छ। हमासद्वारा सञ्चालित स्वास्थ्य मन्त्रालयका अनुसार सोमबार यहाँ कम्तिमा ६७ जनाको मृत्यु भएको छ।