इस्लामावाद: पाकिस्तानमा बिहीबार (८ फरवरी) सम्पन्न चुनावमा इमरान खानको पार्टी पाकिस्तान तेहरीक-ए-इन्साफ (पीटीआई)ले प्रारम्भिक मतगणनाका क्रममा १५० सिटमा अग्रता लिएको दाबी गरेको छ। पीटीआईका अध्यक्ष ब्यारिस्टर गोहरको एक्स अकाउन्टमा शेयर गरेको एक भिडियोमा पूर्व प्रधानमन्त्री खानले पीटीआईले १५० मतको अग्रता लिएको उल्लेख गरिएको छ। यद्यपि, अन्तर्राष्ट्रिय संचारमध्यमका अनुसार, शुक्रबार बिहानसम्म सार्वजनिक १३ स्थानको नतिजामा खान निकट स्वतन्त्र उम्मेदवारले पाँच र पूर्व प्रधानमन्त्री नवाज सरिफ निकट पाकिस्तान मुश्लिीम लीग–नवाज (पीएमएल–एन) ले चार स्थानमा जीत हासिल गरेका छन्। मत गणनासँगै थप उर्जावान बनेका खानले भिडियोमा पञ्जाब, खैबर पख्तुनख्वालगायत सम्पूर्ण पाकिस्तानमा पीटीआईको नेतृत्वमा सरकार बनाउने दाबी गरेका छन्।

खानको आधिकारिक एक्स अकाउन्ट भनिने पीटीआईका अध्यक्ष ब्यारिस्टर गोहरको नामबाट खोलिएको एक्स अकाउन्टमा एक भिडियोमा लेखिएको छ, ‘इन्शअल्लाह पीटीआईले पञ्जाब, केपी र संघीय क्षेत्रमा सरकार बनाउनेछl रातारात परिणाम परिवर्तन गर्ने कुनै पनि प्रयासलाई पाकिस्तानका जनता वा स्थानीय र अन्तर्राष्ट्रिय पर्यवेक्षक र मिडियाले कुनै पनि हालतमा विफल पार्नेछन् र स्वीकार गर्ने छैनन्l’ भिडियोमा भनिएको छ, ‘पीटीआईले २०२४ को चुनावलाई पूर्ण बहुमतले जितेको छ। संसारले यसको साक्षी बनायो। अब परिणामको हेरफेरले पूर्ण अराजकता र अस्थिरताबाहेक अरू केही हासिल गर्दैन। जनताले निर्णय गरेका छन्! उनीहरूको निर्णयको सम्मान गरौँl’

यसबीच पीटीआईका महासचिव ओमार अयुब खानले भनेका छन्, ‘व्यापक धाँधली भइरहेको छ र यो पूर्णतया असम्भव छl’ उनले चुनाव व्यवस्थापन प्रणालीको विश्वसनीयता र ‘पर्दा पछाडिको प्रणालीलाई नियन्त्रण गर्ने अरू कोही’को बारेमा उनको आशंकाका बारेमा चेतावनी दिँदै भनेका छन्, ‘मैले पहिले पनि ‘आरओ’हरूलाई चुनावपछि केही पनि धाँधली नगर्न भनेको थिएँ, तर उनीहरूले त्यही गरिरहेको देखिन्छ। आरओ एनए १९७ का शब्दहरूले राष्ट्रलाई पिरोल्न पुगेको देखिन्छl’ उनले थपे, ‘पूर्णतया अस्वीकार्य!! पीटीआईले करिब दुई करोड ५० लाखदेखि तीन करोडसम्म भोट पाएको छ। पाकिस्तानका जनता र देशले यस्ता ‘धँदला काल (२०१८ देखि २०२३ सम्म’ को अवधि) पीडादायी घटनालाई थप सहन सक्दैनl’ यसैबीच, पीएमएल-एनकी नेतृ मरियम औरङजेबले पञ्जाब प्रान्तमा पीएमएल-एनले जितेको दाबी गरेका छन्। उनले भने, “पाकिस्तान मुस्लिम लिग (एन) ले संघ र पञ्जाबमा सरकार बनाउनेछ र सार्वजनिक सेवाको नयाँ युग शुरु हुनेछl’ औरङजेबल भने, ‘पार्टीको चुनाव समितिको परिणाम आउने क्रम जारी छ। मोबाइल र इन्टरनेट सेवा उपलब्ध नहुँदा परिणाम प्राप्त गर्न कठिन भएको छ। मुस्लिम लीग (एन)को स्थिति दह्रो छl’ उनले अल्लाहको कृपाले पाकिस्तान मुस्लिम लिग (एन) ले जनताको सेवा गर्ने र उनीहरूलाई उनीहरूको समस्याबाट सदा झैं मुक्त गर्ने आफ्नो गम्भीर प्रतिबद्धता पूरा हुने बताएका छन्।