म्याड्रिड, ४ फरवरीः स्पेनिश ला लीगा फूटबलमा गत सीजनको च्याम्पियन बार्सिलोनाले जीतको लय कायम राख्यो। यसबीच शीर्ष दुईमा सामेल गिरोनाले चाहिँ निराशाजनक ड्र-को सामना गर्नु पऱ्यो। शनिवार राति खेलिएको म्याचमा बार्सिलोनाले अलावेसलाई ३-१-ले पराजित गऱ्यो। यस अवे म्याचमा ६५ प्रतिशत पोजेशनको साथ खेल्ने बार्सिलोनाबाट रोबर्ट लेवाण्डोस्कीले २२औं, इल्के गुण्डोगनले ४९औं र विटोर रोकले ६३औं मिनटमा गोल गरे। यसरी अलावेसबाट सामु ओमोरोडिओनले ५१औं मिनटमा गोल गरे। म्याचको ७२औं मिनटमा बार्सिलोनाका सब्स्टीट्यूड खेलाड़ी विटोर रोकलाई रेड कार्ड देखाइयो। यस जीतपछि बार्सिलोना २३ वटा म्याचमा ५० पोइण्ट्सको साथ ला लीगा पोइण्ट्स टेबलको तेस्रो स्थानमा पुग्यो। अलावेस २६ पोइण्ट्स लिएर १२औं स्थानमा छ। यसबीच शीर्ष स्थानको रेसमा रियल म्याड्रिडलाई कड़ा चुनौती दिने गिरोना चाहिँ रियल सोसिएदाद विरुद्ध गोलरहित ड्र (०-०)-मा अल्झियो। आफ्नो होम ग्राउण्डमा ४८ प्रतिशत पोजेशनको साथ खेल्ने गिरोनाले विपक्षी टीमबाट कड़ा चुनौतीको सामना गर्नु पऱ्यो। यस ड्र पछि गिरोना २३ वटा म्याचमा ५६ पोइण्ट्सको साथ दोस्रो स्थानमा कायम रह्यो। यसरी रियल सोसिएदाद ३७ पोइण्ट्सको साथ छैटौं स्थानमा रहेको छ। अन्य म्याचहरूमा भेलेन्सियाले अल्मेरियालाई २-१-ले अनि एथलेटिक क्लबले मालोर्कालाई ४-०-ले पराजित गऱ्यो। यसरी ग्रानाडा र लास पालमासबीचको म्याच १-१-ले ड्र रह्यो।