सिलगढीः सिलगढी सहरमा अवैध टोटो बन्द गर्नुपर्ने माग फेरि उठेको छ। दार्जिलिङ समताल र जलपाइगढी ई-रिक्शा वेलफेयर एसोसिएसनले सिलगढीको डिभिजनल शासकलाई ज्ञापनपत्र बुझाएको छ। जसमा सिलगढी सहरमा अवैध रूपमा चलिरहेको टोटोको आवागमन रोक्न माग गरिएको छ। संगठनको तर्फबाट बिहीबार दिउँसो २.३० बजे सिलगढी महकुमा शासकको कार्यालय अगाडि विरोध प्रदर्शन गरी ज्ञापनपत्र बुझाइएको थियो । सञ्चारमाध्यमसँग कुरा गर्दै संगठनका एक नेताले सिलगढी शहरका धेरै ठाउँमा नम्बर प्लेट बिनाको अवैध टोटो चलिरहेकाले ट्राफिक जाम हुने गरेको बताए। संघका सदस्यहरूले अवैध टोटो ओसारपसारमा रोक लगाउनुका साथै टोटो बनाउने कारखानामा समेत रोक लगाउन माग गरेका छन्।