कोलकाता: रोटरी क्लब अफ बेलुर र नारायणा अस्पताल, हावडाले संयुक्त रूपमा ‘सर्भाइकल क्यान्सर जागरूकता तथा र रोकथाम’ परियोजना शुरु गरेको एक प्रेस विज्ञप्तिमा बताएको छ। विज्ञप्तिका अनुसार, यस पहलको उद्देश्य पाठेघरको क्यान्सरको रोकथाम र उपचारमा प्रकाश पार्नु रहेको छ, विशेष गरी निम्न र मध्यम आय भएका देशहरूमा जहाँ यो महिलाहरूको लागि महत्त्वपूर्ण स्वास्थ्य बोझ बनेको छ। आरसी बेलुरका प्रोजेक्ट अध्यक्ष विष्णु धनधानियाले प्रोजेक्टका प्राथमिक गतिविधिहरूमा अभिभावकीय सचेतना अभियान, एचपीभी खोप सञ्चालन र दीर्घकालीन दिगोपनका लागि गैरसरकारी संस्था र सरकारलाई ज्ञानको प्रसार गर्ने बताए। ग्रामीण महिलाहरूको जीवनमा ठोस प्रभाव पार्ने प्रतिबद्धताका साथ, परियोजनाले कोलकाता वरपरका ग्रामीण जिल्लाहरूमा रहेका सरकारी विद्यालयहरूलाई लक्षित गर्ने विज्ञाप्तिमा बताएको छ। आउँदो वर्षसम्म मानव प्यापिलोमाभाइरस (एचपीभी) विरुद्ध नौ देखि चौदह वर्ष उमेरका दुई हजार केटीहरूलाई खोप लगाउने र पछिल्ला परियोजनाहरू मार्फत यी प्रयासहरूलाई कम सेवाविहीन समुदायहरूमा विस्तार गर्ने लक्ष्य राखिएको छ। नारायणा अस्पताल, हावडाका रोबोटिक शल्याक्रियाका वरिष्ठ सल्लाहकार तथा स्त्री रोग विशेषज्ञ डा. कौस्तव बसुले ह्युमन प्यापिलोमाभाइरस (एचपीभी) खोपले पाठेघरको क्यान्सर रोक्न महत्त्वपूर्ण भूमिका निर्वाह गर्नेबारेमा जोड दिए। नारायण अस्पताल, हावडाका डाक्टरहरू जागरूकता सत्रहरूको लागि कोलकाता र वरपरका विभिन्न विद्यालयहरूमा जानेछन्l जसले रोकथामका लागि बालबालिकामा एचपीभी खोपको महत्त्व र प्रारम्भिक चरणमा क्यान्सर पत्ता लगाउन स्क्रिनिङको महत्त्वलाई पनि उजागर गर्नेछ। यस खोप तथा सचेतना अभियानका लागि विद्यालयसँग सम्पर्क गरिसकिएको छ, जहाँ बालबालिकाका अभिभावक र विद्यालयका शिक्षकहरूलाई पाठेघरको मुखको क्यान्सरबारे जानकारी दिइनेछ । यो अभियान यो महिनाभर अनि फरवारीमा पनि विश्व क्यान्सर दिवस सचेतना अभियानको एक भागको रूपमा चलाइने बताइएको छ।
रोटरी डिस्ट्रिक्ट गभर्नर ३२९१, हिरालाल यादवले भने, ‘सर्भाइकल क्यान्सर सचेतना प्रवर्द्धन गर्ने यस महत्वपूर्ण अभियानमा नारायणा अस्पताल, हावडासँग सहकार्य गर्न पाउँदा हामी सम्मानित छौं। रोटरी क्लबहरूले सार्वजनिक स्वास्थ्यमा सकारात्मक प्रभाव पार्ने साझेदारीको शक्तिलाई मान्यता दिन्छ।’ आरसी बेलूरका अध्यक्ष अमर म्लहोत्राले भने, ‘ एक सहयोगात्मक प्रयासमा रोटरी क्लब अफ बेलूरले अन्तर्राष्ट्रिय रोटरी क्लबहरूसित हात मिलाएको छ, जसमा सिंगापुर हार्टल्याण्ड र सिंगापुरका साथ साथ कोलकाता स्थित चार रोटरी क्लब कोलकाता चौरंगी, हुगली, कोलकाता ईस्ट सेन्ट्रल, चन्दननगर, र डायनेमिक यंग इण्डियाज सामेल रहेको छ।’ नारायणा अस्पताल, हावडाका सुविधा निर्देशक आशिम कुमारले रोटरीसँगको साझेदारीले सामुदायिक स्वास्थ्यप्रतिको प्रतिबद्धता झल्काउने बताए। पाठेघरको क्यान्सरविरुद्धको लडाईमा प्रारम्भिक पहिचान महत्त्वपूर्ण रहेको, र यस महत्त्वपूर्ण कारणमा योगदान गर्न पाउँदा गर्व महसुस गरेको उनले बताए।