उत्तर दिनाजपुरः उत्तर दिनाजपुरको दलखोलामा दोहोरो डकैतीको घटना बाहिर आएको छ। यहाँ डाँकाले एकैसाथ दुई घरमा डकैती गरेका छन्। लुटपाटको विरोध गर्दा डाँकाहरूले धारिलो हतियार प्रहार गरी पाँच जनालाई गम्भीर घाइते बनाएका छन्। स्थानीयवासीबाट प्राप्त जानकारीका अनुसार मोहम्मद इब्राहिम र मोहम्मद रफिकको घरमा २० देखि २५ जनाको समूह एक्कासी प्रवेश गरी घरमा ताण्डव गर्न थाले। परिवारका सदस्यले विरोध गरेपछि ती डाँकाहरूले परिवारका सदस्यमाथि धारिलो हतियार प्रहार गरेका थिए। यस हमलामा दुवै परिवारका पाँच जना गम्भीर घाइते भएका छन्, जसलाई बिहारको किशनगञ्ज अस्पतालमा भर्ना गरिएको छ। लुट र नंगा नाच गराएपछि डाँकाहरूले लाखौं रुपियाँका गरगहना, नगद र अन्य सामान लुटेर फरार भएका थिए। त्यसपछि परिवारले दलखोला पुलिस थानालाई खबर गरेका थिए। पुलिसले घटनास्थलमा पुगेर सम्पूर्ण घटनाको अनुसन्धान शुरू गरेको छ।