अष्ट्रेलिया र पाकिस्तानबीच मेलबर्नमा भइरहेको दोस्रो टेस्ट म्याचको तेस्रो दिन खाजापछि खेल शुरू हुन ढिलो भएको थियो। यसको पछाडि एउटा अनौठो घटना बाहिर आएको छ। जसका कारण फ्यानहरुको हाँसो रोक्न सकिरहेका छैनन्।
वास्तवमा तेस्रो दिनको खाजापछि दुवै टोलीका खेलाडी र मैदानमा रहेका अम्पायर मैदानमा आएर खेल शुरू हुने प्रतीक्षा गर्न थाले। तर, मैदानमा आएपछि पनि खेल शुरू हुन सकेन। वास्तवमा, तेस्रो अम्पायर रिचर्ड इलिंगवर्थ लिफ्टमा फसेका थिए र आफ्नो सेटअप अर्थात् तेस्रो अम्पायरको क्याबिनमा फर्कन सकेनन्। त्यतिबेला खेलाडी र मैदानमा रहेका अम्पायरलाई यो कुरा थाहा थिएन। तर केही समयपछि मैदानका अम्पायरहरूले यो कुरा थाहा पाए र त्यसपछि खेलाडीलाई अवस्थाबारे जानकारी गराए। यसलाई समयमै सुधार गरियो र इलिंगवर्थ आफ्नो क्याबिनमा फर्किएपछि खेल फेरि शुरू भयो। तर, सामाजिक सञ्जालमा यसलाई लिएर धेरै ट्रोल भइरहेको छ।

खेलको कुरा गर्ने हो भने अष्ट्रेलियाले आफ्नो पहिलो इनिङ्समा ३१८ रन बनाएको थियो। मार्नस लाबुस्चेनले ६३ रन, उस्मान ख्वाजाले ४२ र मिचेल मार्सले ४१ रन बनाए। यसबाहेक डेभिड वार्नरले ३८ रन बनाएका थिए। पाकिस्तानका लागि आमिर जमालले ३ विकेट लिए। शाहिन अफ्रिदी, मिर हम्जा र हसन अलीले समान २–२ विकेट लिए। जवाफमा एक समय बलियो सुरुवात गरेको पाकिस्तानको टोली पहिलो इनिङ्समा २६४ रनमा सिमित भयो। कुनै बेला पाकिस्तानको स्कोर एक विकेटमा १२४ रन थियो र त्यसपछि टोलीले १४० रनमा थप नौ विकेट गुमाएको थियो। तेस्रो दिन पाकिस्तानी इनिङ्स २६४ रनमा सिमित भयो।

पाकिस्तानका लागि अब्दुल्लाह शफिकले ६२ रन, कप्तान शान मसूदले ५४ रन, मोहम्मद रिजवानले ४२ र शाहिन अफ्रिदीले २१ रन बनाए। तर, आमिर जमाल ३३ रन बनाएर अविजित रहे। अष्ट्रेलियाका लागि कप्तान प्याट कमिन्सले पाँच र नाथन लियोनले चार विकेट लिए। अहिले अस्ट्रेलियाको दोस्रो इनिङ्स चलिरहेको छ।