जलपाइगढीः डुवर्समा हात्तीको युद्ध जारी छ। हात्तीले दिनहुँ मानिसलाई आक्रमण गरी मानिसको ज्यान गुमाइरहेका छन्। यही शृङ्खलामा आज एउटा हात्तीले दुई जनालाई कुल्चेको छ जसमध्ये एकको मृत्यु भएको छ भने अर्काको उपचार भइरहेको छ। घटना जलपाइगढी जिल्लाको बानरहाट ब्लकको मोराघाट रेन्जको दुर्मारी क्षेत्रमा भएको हो।
प्राप्त जानकारी अनुसार हात्तीको आक्रमणबाट साइकलमा सवार दुई तरकारी बिक्रेता गम्भीर घाइते भएका छन्। गम्भीर घाइते दुवैलाई स्थानीयले धुपगढी ग्रामीण अस्पतालमा लगेका छन्। ड्युटीमा रहेका डाक्टरले एक जनालाई मृत घोषणा गरेका थिए।
प्रत्यक्षदर्शीका अनुसार बिहीबार बिहान करिब ८ बजे जलपाइगढी बानरहाट ब्लकको दुर्मारीबाट दुई जना तरकारी बोकेर गोयरकाटा बजारतर्फ निस्किएका थिए।
गोयरकाटा–नथुआ राज्य राजमार्गको आमरा पुल नजिकैको क्षेत्रमा पुग्ने बित्तिकै सडक छेउमा एउटा हात्ती अचानक देखा परेको थियो। एक्कासी हात्तीले पछ्याएपछि दुवै जना आफ्नो ज्यान जोगाउन जङ्गलतिर दौडे। तर त्यसपछि हात्तीले ती दुई मध्ये एउटालाई आफ्नो सोण्डले समातेर कुच्यो। यस घटनामा अर्का एकजना पनि घाइते भएका छन्। लगत्तै स्थानीयले घाइतेहरूलाई उद्धार गरी धुपगढी ग्रामीण अस्पताल पुऱ्याए थिए। यस दुर्घटनाका कारण मृतकका परिवार शोकमा छन्।