सिलगढी: तीव्र गतिमा आइरहेको बाइकको धक्का लागेर सिलगढीमा एकजना युवकको मृत्यु भएको छ। उक्त घटना गत राति बाघडुग्राको सिङ्गीझोडा चियाकमान नजिक एसियन हाईवे २ मा घटेको हो। मृतक युवक सिलगढीको नवग्राम निवासी दीपङ्कर दासको रूपमा चिन्हित गरिएको छ। घटनामा तिनको स्कुटीमा सवार अझ एकजना युवती र बाइक चालक घाइते भएका छन्। प्राप्त जानकारी अनुसार गत राति सिङ्गीझोडा चियाकमान नजिक बिहार मोडतर्फबाट द्रुत गतिमा आइरहेको एटा बाइकले दीपङ्करको स्कुटीलाई धक्का दिएपछि दीपङ्कर र स्कुटी सवार एकजना युवती घाइते बनेपछि तिनीहरूलाई तत्कालै उद्धार गरेर उत्तरबंग मेडिकल कलेज एवम् अस्पतालमा लगे तापनि त्यहाँका चिकित्सकहरूले दीपङ्करलाई मृत घोषित गरिदिए। अर्कोतिर, बाइक चालकको नाम सुमित सिंह बताइएको छ।