जलपाइगढी: सबै मिड डे मील कर्मचारीहरूलाई २६ हजार रुपियाँ तलब दिन माग गरिएको छ। यही मागलाई लिएर मध्यान्ह भोजनकर्मीहरूले बुधबार दिउँसो जलपाइगढी सहरमा विरोध प्रदर्शन गरेका थिए। आन्दोलनरत मध्याह्न भोजन कर्मचारीहरू जुलुसको रूपमा जलपाइगढी जिल्ला मजिस्ट्रेटको कार्यालयमा पुगे र ज्ञापनपत्र बुझाए। सारा बङ्गला मिड डे मिल मजदुर युनियनका प्रदेश अध्यक्ष सुनन्दा पाण्डेले मिड डे मिलका कामदारलाई महिनाको डेढ हजार रुपियाँमा मात्रै काम गराउने गरेको बताइन्। १२ महिना काम गरेपछि १० महिनाको तलब दिइने गरेको आरोप छ। उनीहरूले विभिन्न माग राख्दै जिल्ला प्रशासन कार्यालयमा प्रदर्शन गरेका हुन्। प्रति विद्यार्थी सरकारी विनियोजन बृद्धि, मिड डे मिल कर्मचारीलाई सम्मान र सरकारी कर्मचारीको मान्यता, न्यूनतम मासिक पारिश्रमिक २६ हजार लगायतका विभिन्न माग राख्दै आन्दोलनको कार्यक्रम आयोजना गरिएको हो।