नेपाल दूरसञ्चार प्राधिकरणले सामाजिक सञ्जाल टिकटकलाई पत्र लेख्दै नेपाल सरकारको निर्णय अनुसार उक्त प्ल्याटफर्मलाई नेपालभित्र नचल्ने बनाएर सहयोग गर्न अनुरोध गरेको छ। प्राधिकरणका अध्यक्ष पुरुषोत्तम खनालले बीबीसीसँग कुरा गर्दै मन्त्रिपरिषद्को निर्णय कार्यान्वयनका लागि सघाउन आफूहरूले टिकटकलाई अनुरोध गरेको बताए।
यसअघि टिकटकका दक्षिण एशियाको पब्लिक पोलिसी र सरकारसँगको सम्बन्ध हेर्ने अधिकारीले उक्त सामाजिक सञ्जालमाथि लगाइएको प्रतिबन्धप्रति चिन्ता व्यक्त गर्दै नेपाल दूरसञ्चार प्राधिकरणलाई यसै साता पत्र पठाएका थिए। नेपालको मन्त्रिपरिषद्ले गरेको उक्त निर्णय अभिव्यक्ति स्वतन्त्रताको मर्म विपरीत रहेको भन्दै टिकटकले सातवटा बुँदामा नेपालमा आफ्नो प्ल्याटफर्मका कामहरूलाई राम्रोसँग अघि बढाउन गरिएका प्रयासको चर्चा गरेको थियो। नेपालमा एउटा ठूलो जमातमाझ लोकप्रिय रहेको टिकटकमाथि प्रतिबन्ध लगाउने सरकारी कदमको कैयौँ सत्तापक्षकै नेताहरूले विरोध गरिरहेका छन् र उक्त विवाद सर्वोच्च अदालतसम्म पुगेको छ। नेपाल दूरसञ्चार प्राधिकरणको जबाफ
यसै साता मानिसहरू दोस्रो ठूलो चाड तिहारमा व्यस्त रहेको समयमा सरकारले टिकटकमाथि प्रतिबन्ध लगाएको थियो। मन्त्रिपरिषद्को निर्णयमा टिकटकका माध्यमबाट सामाजिक सद्भाव एवं सामाजिक वातावरणमा नकारात्मक असर परिरहेकाले नेपालमा टिकटकको प्रयोगमा तत्काल रोक लगाउने र यस सम्बन्धी व्यवस्था सूचना तथा सञ्चार प्रविधि मन्त्रालयले मिलाउने उल्लेख छ। त्यसलगत्तै नेपाल सरकारको निर्णयप्रति असहमति जनाउँदै टिकटकले नेपालका सरकारी निकायहरूसँग भएका समझदारी तथा नेपालमा भएका छलफलहरूबारे सातवटा बुँदामा स्मरण गराएको थियो।
दूरसञ्चार प्राधिकरणले शुक्रवार टिकटकलाई पठाएको उक्त पत्रको जबाफमा नेपाल सरकारले प्रतिबन्ध लगाउनेबारे निर्णय गरेका हुनाले सरकारसँगै समन्वय गर्न उक्त सञ्जाललाई भनिएको छ। उक्त सञ्जालले सामाजिक वातावरणमा नकारात्मक प्रभाव पारिरहेको र सामाजिक सद्भावमा क्षति पुर्‍याइरहेको निष्कर्ष निकाल्दै सरकारले नेपालभित्र टिकटकमाथि प्रतिबन्ध लगाउने निर्णय गरेको पत्रमा उल्लेख छ। बीबीसीले प्राप्त गरेको प्राधिकरणको पत्रमा भनिएको छ, “नेपाल सरकारले नेपाल दूरसञ्चार प्राधिकरणलाई टिकटकको प्ल्याटफर्ममाथिको पहुँचलाई नेपालमा रोक लगाउन निर्देशन दिएको छ। त्यही भएर हामी तपाईँलाई सरकारको निर्णय कार्यान्वयन गर्न सघाउन अनुरोध गर्छौँ र हामी अझै पनि तपाईँलाई टिकटकलाई नेपालभित्र ब्लक गर्न सघाउन अनुरोध गर्छौँ।”
टिकटकको पत्रमा के थियो?
यसअघि टिकटकले नेपालको दूरसञ्चार प्राधिकरणलाई पत्र पठाउँदै उक्त प्ल्याटफर्मलाई बन्द गर्ने सरकारको निर्णयबाट आफू ‘चकित परेको’ जनाएको थियो।उसले टिकटकमाथिको प्रतिबन्धले नेपाली युवाहरूलाई आर्थिक हानि गर्ने स्मरण गराएको छ।प्रयोगकर्ताको सुरक्षा टिकटकको सबैभन्दा महत्त्वपूर्ण प्राथमिकता भएको बताउँदै उसले नेपालमा भएका र नेपालका सरकारी निकायसँग गरिएका समझदारीहरूको स्मरण गराउने सातवटा बुँदा पनि उल्लेख गरेको थियो। उसले संयुक्त रूपमा नेपालमा इन्टरनेट सुरक्षा सचेतना अभियान सञ्चालन गर्न नेपाल दूरसञ्चार प्राधिकरणसँग एउटा समझदारी गरेको पनि जनाएको थियो। त्यस्तै उसले यसै वर्षको गत जुन ७ मा नेपाल सरकारका लागि स्थानीय कानुनको उल्लङ्घन भएको कुनै पनि सामग्रीबारे रिपोर्ट गर्न सकियोस् भनेर ‘ट्रस्ट एन्ड सेफ्टी इन्फोर्समेन्ट टुल (टीएईटी)’ को पहुँच दिएको पनि उल्लेख गरेको थियो।टिकटकले गत अगस्ट २९ मा आफू नेपालमा डिजिटल सेवा करदाताको रूपमा दर्ता पनि भएको स्मरण गराएको छ।त्यस्तै उसले सन् २०२२ को अक्टोबरदेखि गत जुनसम्ममा टिकटकको ‘कम्युनिटी गाइडलाइनहरू’ उल्लङ्घन गरेका २९ लाख ८० हजार भिडिओहरू नेपालमा आफ्नो प्ल्याटफर्मबाट हटाएको बताएको छ।