कोचबिहार: कोचबिहारको बलरामपुरमा एकजना व्यापारीको हत्याको घटना प्रकाशमा आएको छ। मृतक व्यवसायी दिनहाटाको नाजिरहाट निवासी ३५ वर्षीय सुब्रत घोषको रूपमा चिन्हित गरिएको छ। प्राप्त जानकारी अनुसार हिजो राति तिनी एउटा दोकानमा दुधको छेना पुर्‍याएर घर फर्किँदैछु भन्दै फोनमार्फत् स्वास्नीलाई जनाएका थिए। तर अबेर राति भइसक्दा पनि तिनी घर फर्कि आएनन्। यसपछि रक्ताम्मे तथा क्षत-विक्षत अवस्थामा व्यवसायीको लाश उद्धार भएको बताइएको छ। परिवारको आरोप अनुसार घर फर्किरहेको समय दुष्कृतिहरूले तिनीमाथि हमला गर्नको साथै तिनको हत्या गरिदिएको हो। घटनाको खबर पाएर तुफानगञ्ज थाना पुलिस घटनास्थलमा पुगेर लाश उद्धार गर्नको साथै घटनाको जाँच शुरू गरेको पुलिस सूत्रले जनाएको छ।