नयाँ दिल्ली: इजरायल र हमासबीच गत शनिबारदेखि भीषण युद्ध चलिरहेको छ। हमासको पहिलो आक्रमणमा ९०० भन्दा बढी इजरायली मारिएका थिए। योसँगै चार दिनमा भएको युद्धका कारण २१ सय जनाको मृत्यु भएको छ। इजरायलले हमासलाई हटाउन गाजामा लगातार आक्रमण गरिरहेको छ। धेरै देशका मानिसहरू इजरायल र गाजामा फसेका छन्। भारतले आफ्ना नागरिकलाई त्यहाँबाट निकाल्ने निर्णय गरेको छ। बुधबार जानकारी दिँदै भारत सरकारले इजरायल–प्यालेस्टाइनमा अलपत्र परेका आफ्ना नागरिकको उद्धारका लागि ‘अपरेशन अजय’ सुरु गरेको जनाएको छ।

भारत सरकारले विशेष चार्टर्ड उडानहरू मार्फत भारतीय नागरिकहरूलाई फर्काउन सुविधा दिनेछ। साथै, आवश्यक परेमा भारतीय नौसेनाका जहाजहरूलाई पनि सेवामा लगाइनेछ। विदेश मन्त्री एस जयशंकरले सोशल मिडिया प्लेटफर्म एक्समा एक पोस्टमा भने कि इजरायलबाट फर्कन चाहने हाम्रा नागरिकहरूलाई फिर्ता ल्याउनको लागि अपरेशन अजय शुरु गरिएको हो। विशेष चार्टर उडान र अन्य व्यवस्था गरिएको छ। विदेशमा रहेका हाम्रा नागरिकहरूको सुरक्षा र भलाइका लागि पूर्ण रूपमा प्रतिबद्ध छौं। तेल अवीवस्थित भारतीय दूतावासले बिहीबार विशेष उडानका लागि दर्ता भएका भारतीय नागरिकहरूको पहिलो इमेल जारी गरेको जनाएको छ। यसले अर्को उडानका लागि अन्य दर्ता भएका व्यक्तिहरूलाई सन्देश पठाइने बताएको छ। जयशंकरले बुधबार साँझ युएईका विदेशमन्त्री शेख अब्दुल्लाह बिन जायदसँग पनि कुरा गरेका थिए। उनीहरुले पश्चिम एसियामा जारी संकटका बारेमा छलफल भएको र सम्पर्कमा रहन सहमत भएको ट्वीट गरेका छन्। हमासले ७ अक्टोबरमा इजरायलमा हमला गरी सामूहिक हत्या गरेपछि कुनै अरब देशका विदेशमन्त्रीसँग उनको यो पहिलो सम्पर्क थियो। अमेरिकी विदेशमन्त्री ब्लिन्किन इजरायलको भ्रमणमा छन्। अमेरिकाले इजरायललाई युद्ध उपकरणहरू निरन्तर आपूर्ति गरिरहेको छ र पूर्ण रूपमा इजरायलको साथमा उभिएको छ। अमेरिकाले यस आक्रमणमा २० अमेरिकी नागरिकको मृत्यु भएको आशंका गरेको छ।