सिलगढी: प्रतिबन्धका बाबजुद पनि सिलगढी सहरका विभिन्न ठाउँमा प्रतिबन्धित प्लाष्टिकका झोलाको प्रयोग भइरहेको छ। तरकारी, फलफूल, माछा बजारदेखि किराना पसलसम्म ग्राहकलाई प्लाष्टिकको झोलामा सामान दिइने गरेको छ। यही कारणले गर्दा सिलगढी नगर निगमले दुर्गा पूजा अघि एकपटक फेरि अभियानमा लागेको छ। प्लाष्टिकका झोला जफतसँगै व्यवसायीलाई जरिवाना समेत गरिएको छ। महानगरपालिकाका कर्मचारीले शनिबार फुलेश्वरी बजारमा छापा मारेका छन्।

धेरै व्यवसायीलाई ५ सय रुपैयाँ जरिवाना गरिएको छ। यसैबीच, व्यवसायीले जरिवानाप्रति आक्रोश व्यक्त गरेका छन्। ठूला व्यापारीले सहरका धेरै ठाउँमा प्लाष्टिकका झोला बिक्री गरिरहेका छन्। त्यहाँबाट सहरका बजारका पसलहरूमा क्यारीब्याग आउने गरेका छन्। तर, ठूला व्यापारी र प्लाष्टिकको क्यारी ब्याग उत्पादकलाई कारबाही किन नहुँदा व्यवसायीले प्रश्न उठाएका छन्।