मीठो चियाको चुस्की

विश्वलाई पिलाएर

दुःखको व्हिस्कीले

मातिएका चियाबारी श्रमिकको

पसिना र खून पिएर

मुनाफा कमाउने

मालिक, मालिकको संरक्षक

हरियो सुनमा अशर्फी, डलर देख्छन्

अनि त्यही डलरले

दिल्ली, कलकत्तामा कारखाना खोली

बार्बी डलहरू उत्पादन गर्छन् र

पहाडमा पठाउँछन्

शहर,कमान र बस्तीमा

चाबी, ब्याट्री

आफ्नो हातमा राखी;

बार्बी डलहरु

छमछम नाच्छन्

प्री रेकर्डेड गीतमा

मुन्टो बटार्दै, कम्मर मर्काउँदै,

बार्बी डलका अवैध सन्तानहरू

थप्पडी मार्छन् उफ्री उफ्री

र भन्न मन लाग्छ

वाह! क्या मजा छ पहाड़मा

बार्बी डलहरूको नौटंकी हेर्नु

नौटंकी हेर्दै थप्पडी मार्नु!