राजगञ्ज: राजगञ्जको माझियाली ग्राम पञ्चायतको नवनिर्वाचित प्रधानलाई आज पार्टीका कार्यकर्ता तथा समर्थकहरूले संवर्द्धना जनाए। डाङ्गापाडा १०७ नम्बर बुथमा आज तृणमूल कङ्ग्रेसको तर्फबाट एउटा संवर्द्धना कार्यक्रमको आयोजना गरियो। राजगञ्जको भुटकीहाटका सुमित दत्त उर्फ् मुन्नाले यस वर्ष प्रथमपल्ट तृणमूल प्रार्थीको रूपमा १०९ नम्बर बुथबाट पञ्चायत चुनाउमा खडा भएका थिए भने तिनले चुनाउमा जीत हासिल गरेका थिए। तिनी समाजसेवकको रूपमा परिचित छन्। पार्टीको तर्फबाट तिनलाई माझियाली ग्राम पञ्चायत प्रधान चयन गरियो। सुमित दत्त पञ्चायत प्रधान चयन भएकोमा इलाकावासीहरू खुसी छन्। तिनको उक्त उपलब्धिले युवाहरूलाई प्रेरणा दिने धेरैजनाको विश्वास रहेको छ। यस विषयमा सुमित दत्तले भने, विपक्षी पार्टीलाई साथमा लिएर काम गर्न चाहन्छु। इलाकाको विकास गर्नु नै मेरो मुख्य लक्ष्य हो।