कोलकाता : राज्यका पूर्वमुख्यमन्त्री बुद्धदेव भट्टाचार्यको शारीरिक अवस्था पहिलेको तुलनामा केही सुधारिएको छ । तर उनीमा हेमोग्लोबिनको मात्रा सामान्यभन्दा कम देखिएपछि चिकित्सकले उनलाई रगत दिने निर्णय गरेका हुन् । बुद्धदेवलाई श्वासप्रश्वासमा समस्या भएको अवस्थामा हेमोग्लोबिनको मात्रा सामान्य राख्न आवश्यक रहेको चिकित्सक बताउँछन् । यसका लागि उनीहरूमा हेमोग्लोबिनको मात्रा १० माथि लिने प्रयास भइरहेको छ । यसका लागि उनलाई अहिले एक युनिट रगत दिइएको थियो । आज अर्थात बुधबार पनि आवश्यकता परे बुद्धदेवलाई रगत चढाउन सकिन्छ । मंगलबार पनि बुद्धदेवलाई राईल्स ट्युबबाट खाना खुवाइएको थियो । उनको शरीरमा सोडियम र पोटासियमको मात्रा सही छ । मृगौलामा असर पर्ने सम्भावना रहेको संक्रमणसँग लड्न उनलाई कडा एन्टिबायोटिक दिइँदैछ । अहिले उनको क्रिएटिनिन पहिलेको तुलनामा नियन्त्रणमा रहेको तर हाल एन्टिबायोटिकको डोज ५ दिनसम्म रहने चिकित्सकले बताएका छन् । मंगलबार पूर्व मुख्यमन्त्रीले चिकित्सकसँग पनि संक्षिप्त कुराकानी गरेका थिए । बुद्धदेव भट्टाचार्यलाई सास फेर्न गाह्रो भएपछि गत शनिबार वुडल्याण्ड अस्पतालमा भर्ना गरिएको थियो । सभामुख विमान ब्यानर्जीले पूर्व मुख्यमन्त्री बुद्धदेव भट्टाचार्यको शीघ्र स्वास्थ्यलाभको कामना गरेका छन् ।