कोलकाता: ​कोलकातामा बढ्दो सवारी चापलाई कम गर्न र मालसामान ढुवानीलाई सहज बनाउन राज्य सरकारले हुग्ली नदीमुनि एउटा अत्याधुनिक अण्डरवाटर टनल कोरिडोर निर्माण गर्ने महत्वाकांक्षी योजना अघि सारेको छ। करिब ८ हजार करोड रुपैयाँको लागतमा निर्माण हुन लागेको यस परियोजना अन्तर्गत कोलकातादेखि हावडाको आलमपुरसम्म साढे चार किलोमिटर लामो सुरुङमार्ग बनाइनेछ। यो परियोजना पूरा भएपछि कार, बस र भारी मालवाहक सवारी साधनहरूले नदीमुनिबाट आवतजावत गर्न सक्नेछन्। कोलकाताले यसअघि नै देशकै पहिलो अण्डरवाटर मेट्रो सेवाको अनुभव लिइसकेको सन्दर्भमा सरकारले अब सडक यातायातका लागि पनि यो दोस्रो ठूलो कदम चालेको हो। प्रस्तावित सुरुङलाई आधुनिक इन्जिनियरिङ प्रविधि प्रयोग गरेर भविष्यको आवश्यकता अनुरूप डिजाइन गरिनेछ।
​यस सुरुङमार्गसँगै एउटा एलिभेटेड कोरिडोर, रेल ओभरब्रिज र एप्रोच रोडको समेत निर्माण गरिने योजना छ। यो कोरिडोर सिधै राष्ट्रिय राजमार्ग–१६ (NH-16) सँग जोडिनेछ र भविष्यमा वाराणसी–कोलकाता इकोनोमिक कोरिडोरसँग पनि यसको लिंक जोडिनेछ। यसले कोलकाता र हावडाबीचको सडक सञ्जाललाई अझ बढी मजबुत बनाउनेछ। विज्ञहरूका अनुसार यो सुरुङ सञ्चालनमा आएपछि सहरकै सबैभन्दा ब्यस्त मार्गमध्येको एक विद्यासागर सेतुमा सवारी साधनको दबाब उल्लेखनीय रूपमा घट्नेछ। हाल दैनिक हजारौँ सवारी साधनले उक्त पुल प्रयोग गर्दा दिनहुँ जाम हुने गरेकोमा नयाँ सुरुङले ट्राफिकको ठूलो हिस्सालाई वैकल्पिक मार्ग प्रदान गर्नेछ।
​यस परियोजनाबाट सबैभन्दा ठूलो फाइदा श्यामाप्रसाद मुखर्जी बन्दरगाहलाई हुने अपेक्षा गरिएको छ। बन्दरगाहसम्म आउने–जाने भारी मालवाहक ट्रकहरू सिधै यो सुरुङ भएर गुड्न सक्ने भएकाले ढुवानी खर्च र समय दुवै बचत हुनेछ, जसले आयात–निर्यात गतिविधिलाई प्रोत्साहन मिल्नेछ। सुरुमा नदीमाथि अर्को पुल बनाउने प्रस्ताव गरिएको भए तापनि नयाँ सरकारले दिगो र आधुनिक विकल्पका रूपमा नदीमुनिको सुरुङलाई प्राथमिकता दिएको हो। राष्ट्रिय राजमार्गसँग जोडिएको योजना भएकाले यसमा केन्द्र सरकारको भूमिका पनि महत्त्वपूर्ण छ। हालै बन्दरगाह प्राधिकरण र केन्द्रीय जहाज मन्त्रालयले यसका लागि आवश्यक अनापत्ति प्रमाणपत्र (NOC) दिन सहमति जनाएसँगै यसको प्रशासनिक प्रक्रिया निकै तीव्र बनेको छ। यो परियोजनाले कोलकाताको रूपरेखा बदल्नुका साथै पश्चिम बङ्गाललाई पूर्वी भारतकै प्रमुख लजिस्टिक र औद्योगिक केन्द्रका रूपमा स्थापित गर्ने विश्वास गरिएको छ।