हेल्मेट नलगाउने चालकलाई निःशुल्क हेल्मेट वितरण

​सिलगढी: सडक सुरक्षा र सुरक्षित यात्रालाई प्रवर्द्धन गर्ने उद्देश्यका साथ सिलगढीको कोर्ट मोड क्षेत्रमा एक विशेष सडक सुरक्षा सचेतना कार्यक्रम आयोजना गरिएको छ।
‘श्री शान्ति होन्डा’ र ‘पानीट्याङ्की ट्राफिक गार्ड’ को संयुक्त तत्त्वावधानमा आयोजित उक्त कार्यक्रममा ट्राफिक पुलिसका डीसीपी काजी समसुद्दिन अहमद लगायत अन्य वरिष्ठ ट्राफिक पुलिस अधिकारीहरू र संस्थाका प्रतिनिधिहरूको उपस्थिति रहेको थियो।
​कार्यक्रम अवधिभर ट्राफिक नियम उल्लङ्घन गर्ने र हेल्मेट नलगाई मोटरसाइकल तथा स्कुटर चलाउने चालकहरूलाई रोकेर ट्राफिक नियमबारे सचेत गराइएको थियो। साथै, उनीहरूलाई सुरक्षित भविष्य र जीवन रक्षाका लागि संस्थाको तर्फबाट निःशुल्क हेल्मेट समेत वितरण गरिएको थियो। सहभागी चालकहरूलाई आगामी दिनमा अनिवार्य रूपमा हेल्मेट लगाएर मात्र सवारी साधन चलाउन आग्रह गरियो। श्री शान्ति होन्डाका जनरल म्यानेजर बानीब्रत नन्दीले यस्ता सामाजिक पहलहरूलाई आगामी दिनमा पनि निरन्तरता दिइने र पुलिस प्रशासनसँग मिलेर सर्वसाधारणमा सडक सुरक्षासम्बन्धी चेतना फैलाउन थप कार्यहरू गरिने बताए।