गान्तोक: सिक्किम शेर्पा प्रोटेक्सन बोर्डले खस समुदाय विरुद्ध सामसङ तामाङले गरेको जातीय र विभाजनकारी टिप्पणीको कडा रुपमा निन्दा गरेको छ। बोर्डले आरोपी तामाङ विरुद्ध तत्काल कारबाही नगरिएकोमा गहिरो चिन्ता पनि व्यक्त गरेको छ।सिक्किम शेर्पा प्रोटेक्सन बोर्डका अध्यक्ष सोनाम ग्याछो शेर्पाले सिक्किम सबै समुदायहरूबीच शान्तिपूर्ण सहअस्तित्व र एकताको भूमि रहेको बताउॅंदै विभाजन सिर्जना गर्ने कुनै पनि प्रयासलाई ढिलाइ नगरी दृढतापूर्वक कारबाही गरिनुपर्छ भनी विज्ञप्तिमा बताएका छन्। उनले सामसङ तामाङ विरुद्ध तत्काल कानुनी कारबाही गर्न तथा सामाजिक सद्भाव कायम राख्न र तनावलाई थप बढ्नबाट रोक्न प्रशासनलाई निर्णायक कदम उठाउन माग गरेका छन्।उनले खस समुदायप्रति ऐक्यबद्धता व्यक्त गर्दै खस समुदाय सदैव सिक्किमको साझा इतिहास, संस्कृति र प्रगतिको अभिन्न अंग रहेको बताएका छन्। उनले हाम्रो एकता नै हाम्रो शक्ति हो भन्दै कुनै पनि विभाजनकारी विषयले हाम्रा समुदायहरूबीचको सद्भावलाई बिगार्न दिनु हुँदैन भनी आह्वान पनि गरेका छन्। उनले सरकार र कानुन प्रवर्तन एजेन्सीहरूलाई सिक्किमका सबै समुदायको एकता र मर्यादाको रक्षा गर्न द्रुत र जिम्मेवारीपूर्वक कार्य गर्न आह्वान गरेका छन्।