बेंगलुरु: भारतीय महिला क्रिकेटर स्मृति मन्धनाले आइतवार एमए चिदाम्बरम स्टेडियममा दक्षिण अफ्रिका विरुद्ध खेलिएको पहिलो वनडे म्याचमा शतक बनाउनको साथै अन्तर्राष्ट्रिय क्रिकेटमा ७ हजार रन पनि पूरा गरिन्। अन्तर्राष्ट्रिय क्रिकेटमा ७ हजार रन पूरा गर्ने उनी दोस्रो भारतीय महिला क्रिकेटर हुन्। पूर्व कप्तान मिताली राजले आफ्नो असाधारण करियरमा १०,८६८ रन बनाएकी थिइन्। अन्तर्राष्ट्रिय क्रिकेटमा सर्वाधिक रन बनाउने भारतीय महिला क्रिकेटरहरूकी सूचीमा मन्धनापछि वर्तमान कप्तान हरमनप्रीत कौर रहेकी छन्, जसले ६,८७० रन बनाएकी छन् । मन्धनाले आज १२७ बलमा १२ वटा चौका र एउटा छक्काको सहायताले ११७ रन बनाइन्। यो उनको घरेलु मैदानमा पहिलो अनि दक्षिण अफ्रिका विरुद्ध दोस्रो वनडे शतक हो। यसरी समग्रमा यो उनको छैटौं वनडे शतक हो। मन्धनाले अहिलेसम्म अन्तर्राष्ट्रिय क्रिकेटमा सबै प्रारूप (टेस्ट, वनडे र टी२०) मिलाएर ७०५९ रन बनाएकी छन्। यसमा ७ वटा शतक सामेल छ। आज खेलिएको म्याचमा भारतीय महिला टीमले दक्षिण अफ्रिकालाई १४३ रनले पराजित गऱ्यो। भारतले दिएको २६६ रनको लक्ष्यलाई खेदो गर्दै दक्षिण अफ्रिकी टीम ३७.४ ओभरमा १२२ रन बनाएर अलआउट भयो।