राजस्वको हिसाबले विश्वको सबैभन्दा ठूलो कम्पनी वालमार्टको प्रवर्द्धक वाल्टन परिवारलाई विश्वको सबैभन्दा धनी परिवार मानिन्छ। यस परिवारका तीन सदस्य विश्वका धनी व्यक्तिहरूको सूचीमा ११औं, १२औं र १३औं स्थानमा छन्। यसबाहेक यस परिवारका थप दुई सदस्यले पनि धनी व्यक्तिहरूको सूचीमा स्थान पाएका छन्। यी पाँच जनाको संयुक्त कुल सम्पत्ति ४१४.१ अर्ब डलर छ, जुन विश्वको सबैभन्दा धनी व्यक्ति एलोन मस्क (४२१ अर्ब डलर) भन्दा अलि कम हो। वाल्टन परिवारको वालमार्टमा ४७% हिस्सा छ। वालमार्टको स्थापना सन् १९६२ मा साम वाल्टनले गरेका थिए। आज यो विश्वको सबैभन्दा ठूलो रोजगारदाता हो। यसमा २१ लाखभन्दा बढी कर्मचारी काम गर्छन् जुन धेरै देशहरूको जनसंख्याभन्दा बढी हो। ब्लूमबर्ग बिलियनेयर इन्डेक्सका अनुसार, साम वाल्टनका छोरा जिम वाल्टन १२० अर्ब डलरको कुल सम्पत्तिका साथ विश्वका धनी व्यक्तिहरूको सूचीमा ११ औं स्थानमा छन्। उनका भाई रोब वाल्टन ११७ अर्ब डलरको कुल सम्पत्तिका साथ १२औं स्थानमा छन् भने बहिनी एलिस वाल्टन ११७ अर्ब डलरको कुल सम्पत्तिका साथ १३औं स्थानमा छन्। एलिस वाल्टन संसारकै सबैभन्दा धनी महिला हुन्। साम वाल्टनका एक छोरा, जोन वाल्टनको मृत्यु भएको छ। उनका छोरा लुकास वाल्टनको कुल सम्पत्ति ४१.३ अर्ब डलर छ र उनी विश्वका धनी व्यक्तिको सूचीमा ३७ औं स्थानमा छन्।