​
नयाँ दिल्ली: आधुनिक युद्धको बदलिँदो स्वरूप र प्रविधिलाई मध्यनजर गर्दै भारतीय वायुसेनाले पूर्ण रूपमा स्वदेशी प्रविधिमा आधारित आत्मघाती कामिकेजे ड्रोन निर्माण गर्ने महत्त्वाकाङ्क्षी परियोजना अघि बढाएको छ। रूस-युक्रेन युद्ध तथा इजरायल-इरान द्वन्द्वमा यस्ता आत्मघाती ड्रोनको प्रभावकारिता उच्च देखिएपछि वायुसेनाले देशभित्रकै निजी तथा सरकारी कम्पनीहरूसँगको सहकार्यमा यो परियोजना सुरु गरेको हो।
​परियोजना अन्तर्गत वायुसेनाले ‘वान-वे अट्याक अनम्यान्ड एरियल सिस्टम’ (ओडब्ल्यूए-यूएएस) अर्थात् एकतर्फी आक्रमण गर्ने मानवरहित हवाई प्रणालीको विकास, डिजाइन, उत्पादन र मर्मतसम्भारका लागि एउटा बलियो स्वदेशी इकोसिस्टम तयार पार्न लिमिटेड टेन्डर (बोलपत्र) समेत जारी गरिसकेको छ।
​कामिकेजे वा आत्मघाती ड्रोन भन्नाले त्यस्ता मानवरहित हवाई वाहन (यूएभी) लाई बुझाउँछ, जसले लक्षित क्षेत्रमा उडेर गई शत्रुको ठेगाना पत्ता लगाउने र सिधै ठोक्किएर आफैँलाई ध्वस्त पार्दै ठूलो विस्फोट गराउने गर्छन्। रक्षा उत्पादनमा पूर्ण आत्मनिर्भरता प्रवर्द्धन गर्ने उद्देश्यका साथ अघि सारिएको यस परियोजनाको नोडल एजेन्सीका रूपमा कोइम्बटोर नजिकैको सुलुरस्थित ‘५ बेस रिपेयर डिपो’ लाई तोकिएको छ।
​वायुसेनाका अनुसार यस ड्रोन प्लेटफर्मको ‘बौद्धिक सम्पत्ति अधिकार’ (इंटेलेक्चुअल प्रॉपर्टी राइट्स) वायुसेना स्वयंको मातहतमा रहनेछ। टेन्डरका सर्तहरू अनुसार निर्माण हुने ड्रोनहरू १६ हजार फिटको उचाइसम्म उड्न सक्ने र दिन तथा रात दुवै परिस्थितिमा समान रूपमा घातक प्रहार गर्न सक्षम हुनुपर्नेछ। यो परियोजनालाई भारतीय रक्षा क्षेत्रमा एउटा ठूलो रणनीतिक फड्कोका रूपमा हेरिएको छ।