कोलकाता। रुबी जनरल अस्पतालले आफ्नो शल्यक्रिया पूर्वाधारमा ठूलो विस्तार गर्दै ६ वटा अत्याधुनिक मोड्युलर अपरेसन थिएटर (ओटी) थप गरेको छ। नयाँ संरचनामा २ वटा विशेष ट्रान्सप्लान्ट ओटी र २ वटा अत्याधुनिक रोबोटिक सर्जरी ओटीसमेत रहेका छन्। यस विस्तारसँगै अस्पतालमा अत्याधुनिक तथा विशेषीकृत शल्यक्रिया कक्षको कुल संख्या ११ पुगेको छ।
नयाँ ओटीहरू सञ्चालनमा आएपछि जटिल, जीवनरक्षक तथा उच्च जोखिमयुक्त शल्यक्रिया गर्न अस्पतालको क्षमता उल्लेखनीय रूपमा वृद्धि हुने अस्पतालले जनाएको छ। नयाँ संरचनासँगै यसअघि सञ्चालनमा रहेका ५ वटा सुपर स्पेसियालिटी ओटी पनि निरन्तर सञ्चालनमा रहनेछन्।
दुई अत्याधुनिक रोबोटिक सर्जरी प्रणाली थप
पूर्वाधार विस्तारसँगै रुबी जनरल अस्पतालले दुई अत्याधुनिक रोबोटिक सर्जरी प्रणाली पनि औपचारिक रूपमा सञ्चालनमा ल्याएको छ। यसमा सामान्य तथा जटिल शल्यक्रियाका लागि विश्वप्रसिद्ध ‘दा भिन्ची रोबोटिक सर्जिकल सिस्टम’ तथा अर्थोपेडिक टोटल नी रिप्लेसमेन्टका लागि रोबोटिक सर्जरी सिस्टम रहेका छन्।

दा भिन्ची रोबोटिक प्रणालीले न्यूनतम चिरफार (मिनिमली इनभेसिभ) प्रविधिमार्फत अत्यन्त सूक्ष्म र सटीक शल्यक्रिया गर्न चिकित्सकलाई सहयोग गर्नेछ। यसले बिरामीलाई तुलनात्मक रूपमा कम पीडा, कम रक्तस्राव तथा छिटो स्वास्थ्यलाभतर्फ सहयोग पुर्‍याउने अपेक्षा गरिएको छ।
त्यस्तै, अर्थोपेडिक टीकेआर रोबोटिक प्रणालीले घुँडा प्रत्यारोपणका क्रममा सब-मिलिमिटर तहसम्मको सटीकता हासिल गर्न सहयोग गर्ने अस्पतालको दाबी छ। यसबाट इम्प्लान्टको सही स्थान निर्धारण तथा कृत्रिम जोर्नीको दीर्घकालीन कार्यक्षमता सुधार गर्न मद्दत पुग्नेछ।
संक्रमण नियन्त्रणमा विशेष ध्यान
नवनिर्मित ६ वटा मोड्युलर ओटी अत्याधुनिक प्रविधिमा आधारित छन्। संक्रमण नियन्त्रणलाई प्राथमिकता दिँदै ओटीहरूमा ल्यामिनार एयरफ्लो सिस्टम जडान गरिएको छ। साथै, जटिल अंग प्रत्यारोपणका लागि २ वटा विशेष ट्रान्सप्लान्ट ओटी र रोबोटिक शल्यक्रियाका लागि २ वटा विशेष ओटी तयार गरिएको छ।
नयाँ ओटीहरू निकट भविष्यमा पूर्ण रूपमा सञ्चालनमा आउनेछन् भने दुवै रोबोटिक सर्जरी प्रणाली सञ्चालनमा आइसकेका छन् र बिरामी सेवाका लागि उपलब्ध छन्।
‘उन्नत प्रविधि क्षेत्रीय स्तरमै उपलब्ध गराउने प्रयास’
उद्घाटन समारोहमा अस्पतालका अध्यक्ष तथा प्रबन्ध निर्देशक डा. कमल कुमार दत्तले अत्याधुनिक चिकित्सा प्रविधि र त्यसको क्षेत्रीय पहुँचबीच रहेको अन्तर कम गर्न अस्पतालको यो विस्तार महत्वपूर्ण कदम भएको बताए।
अस्पतालका निर्देशक डा. सौरभ दत्तले अपरेसन थिएटरमा कृत्रिम बुद्धिमत्ता (एआईं ) र रोबोटिक प्रविधिको प्रयोगले शल्यक्रियाको सटीकता र बिरामी सुरक्षालाई थप बलियो बनाउने बताए। उनका अनुसार प्रविधिको प्रभावकारी प्रयोगले अस्पतालमा बिरामी बस्नुपर्ने समयसमेत घटाउन सहयोग पुग्न सक्छ।
अर्की निर्देशक रुबी दत्तले नयाँ पूर्वाधार अस्पतालको तीन दशकभन्दा लामो स्वास्थ्यसेवा यात्रामा नवप्रवर्तन तथा बिरामीकेन्द्रित उपचारप्रतिको निरन्तर प्रतिबद्धताको प्रमाण भएको बताइन्।
ट्रान्सप्लान्ट र रोबोटिक सर्जरीमा विशेषज्ञताको विस्तार
प्रेस मिटमा वरिष्ठ नेफ्रोलोजिस्ट डा. प्रतीक दास तथा प्रख्यात ट्रान्सप्लान्ट सर्जन डा. टी. के. साहाको पनि उपस्थिति थियो। उनीहरूले पूर्वी भारतमा आधुनिक तथा उन्नत अंग प्रत्यारोपण सेवाको आवश्यकता बढ्दै गएको उल्लेख गर्दै रुबी जनरल अस्पतालमा थपिएको नयाँ पूर्वाधारले यस क्षेत्रमा महत्वपूर्ण योगदान पुर्‍याउने बताए।
त्यस्तै, जनरल तथा रोबोटिक सर्जन डा. देवार्चन घोष र अर्थोपेडिक्स तथा रोबोटिक सर्जन डा. दीपाञ्जन भद्रले रोबोटिक प्रविधिमार्फत विभिन्न शल्यक्रिया क्षेत्रमा हासिल गर्न सकिने सटीकता, सुरक्षा र उपचार क्षमताबारे आफ्नो धारणा प्रस्तुत गरे।
क्यान्सर उपचारमा पनि रोबोटिक प्रविधिको प्रयोग
रुबी क्यान्सर सेन्टरका निर्देशक तथा एमेरिटस सर्जिकल अन्कोलोजिस्ट डा. गौतम मुखोपाध्यायले दा भिन्ची रोबोटिक प्रणालीको प्रयोगले क्यान्सर शल्यक्रियामा थप आधुनिक उपचार विकल्प उपलब्ध हुने बताए।
उनका अनुसार रुबी क्यान्सर सेन्टरमा मेडिकल अन्कोलोजी, सर्जिकल अन्कोलोजी, रेडिएसन अन्कोलोजी, हेमाटो-अन्कोलोजी तथा स्टेम सेल ट्रान्सप्लान्टलगायतका सेवा उपलब्ध छन्। साथै, न्युक्लियर मेडिसिनअन्तर्गत डिजिटल पीईटी-सीटी, अन्कोप्याथोलोजी, मनोवैज्ञानिक तथा पोषणसम्बन्धी सेवासहित विभिन्न विशेषज्ञलाई एउटै उपचार प्रणालीमा जोडिएको उनले बताए।
रुबी जनरल अस्पतालका अनुसार नयाँ ६ वटा मोड्युलर ओटीले अस्पतालको शल्यक्रिया क्षमता उल्लेखनीय रूपमा विस्तार गर्नेछ भने रोबोटिक सर्जरी प्रणालीले न्यूनतम इनभेसिभ तथा उच्च सटीकतामा आधारित उपचारलाई थप गति दिनेछ।
अस्पतालले पूर्वी भारतमा अत्याधुनिक रोबोटिक चिकित्सा र शल्यक्रिया सेवाको पहुँच विस्तार गर्ने उद्देश्यसहित यो पूर्वाधार विकास गरिएको जनाएको छ।