नयाँ दिल्ली: विपक्षका नेता राहुल गान्धीले लोकसभा अध्यक्ष ओम बिर्लामाथि गम्भीर आरोप लगाउँदै भनेका छन् कि स्पिकरले व्यक्तिगत रूपमा बजेटमाथिको छलफल सुरु हुनुअघि उनलाई बोल्ने अवसर दिने आश्वासन दिएका थिए, तर अहिले त्यो प्रतिबद्धताबाट पछि हटिँदैछ।
संसदको बजेट अधिवेशनको तेस्रो हप्ता सुरु भए पनि अहिलेसम्म बजेटमाथिको छलफल सुरु हुन सकेको छैन। सोमबार पनि लोकसभामा अवरोध जारी रह्यो र तीव्र हंगामापछि दिनभरिका लागि सदनको कार्यवाही स्थगित गरियो।
यसै सन्दर्भमा राहुल गान्धीले पुनः आरोप लगाउँदै भने कि स्पिकरले बजेट छलफल सुरु हुनुअघि आफूलाई बोल्ने अवसर दिने व्यक्तिगत आश्वासन दिएका थिए, तर अहिले त्यो पालना भइरहेको छैन।
राहुल गान्धीले बैठकको अध्यक्षता गरिरहेकी पीठासीन सांसद सन्ध्या रायलाई भने, “करिब एक घण्टा अघि हामी स्पिकरको च्याम्बरमा उहाँसँग भेट गरेका थियौँ। उहाँले बजेट छलफल सुरु हुनुअघि मलाई बोल्न दिने प्रतिबद्धता गर्नुभएको थियो। के मलाई मेरा कुरा राख्ने अनुमति दिइनेछ?”
तर सन्ध्या रायले स्पष्ट पारिन् कि यस विषयमा कुनै सूचना (नोटिस) प्राप्त भएको छैन र नोटिस बिना कसैलाई बोल्न अनुमति दिन सकिँदैन।
त्यसपछि सन्ध्या रायले राहुल गान्धीको सट्टा कंग्रेस सांसद शशि थरूरलाई बजेटमाथि बोल्न आग्रह गरिन्। थरूरले संसदीय परम्पराको उल्लेख गर्दै भने कि वर्षौँदेखि बजेट छलफलमा सबैभन्दा पहिले विपक्षी दलका नेताले बोल्ने चलन रहँदै आएको छ। तर विपक्षी सदस्यहरू आफ्ना मागमा अडिग रहे र सदनमा हंगामा सुरु भयो। फलस्वरूप, सदनको कार्यवाही १० फेब्रुअरी बिहान ११ बजेसम्मका लागि स्थगित गरियो।
यसबीच संसदीय मामिला मन्त्री किरेन रिजिजुले राहुल गान्धीका आरोप अस्वीकार गर्दै भने, “अवरोध अन्त्य गर्न स्पिकरले एउटा बैठक बोलाउनुभएको थियो। त्यहाँ राहुल गान्धी पनि हुनुहुन्थ्यो, म पनि उपस्थित थिएँ। स्पिकरले कुनै प्रतिबद्धता गर्नुभएको थिएन। उहाँले केवल यति भन्नुभएको थियो कि यदि सहमति बन्यो भने सबै नेताहरूलाई बोल्ने अवसर दिइनेछ।”
रिजिजुले थपे कि राहुल गान्धी के विषयमा बोल्न चाहन्छन्, त्यो पनि स्पष्ट छैन। यदि उनले स्पिकरमाथि आरोप लगाउँछन् भने, त्यसको जवाफ स्पिकरको तर्फबाट पनि आउनेछ। उनले विपक्षलाई सदनको गरिमा कायम राख्न आग्रह गरे।
यता विपक्षी दलहरूले स्पिकर ओम बिर्लाविरुद्ध अविश्वास प्रस्ताव ल्याउने निर्णय गरेका छन्। विपक्षको आरोप छ कि अध्यक्षले पक्षपातपूर्ण व्यवहार गरिरहेका छन् र सदनमा विपक्षको आवाज दबाइँदैछ। स्रोतका अनुसार सबै विपक्षी दलका सांसदहरूले उक्त प्रस्तावमा हस्ताक्षर गरिसकेका छन्।
कंग्रेस सांसद प्रियंका गान्धी वाड्राले भनिन्, “स्पिकर साहेब आफैं अपमानित भइरहनुभएको छ। उहाँमाथि दबाब छ, त्यसैले पटक–पटक सफाइ दिनुपरेको छ। प्रधानमन्त्रीमाथि आक्रमण गर्ने प्रश्नै उठ्दैन। सत्य के हो भने, त्यस दिन प्रधानमन्त्री मोदीसँग सदनमा आउने साहस नै थिएन।”
शशि थरूरले भने कि सदनमा सधैं यो परम्परा रहँदै आएको छ कि विपक्षी दलका नेता र संसदीय मामिला मन्त्री—दुवैलाई बोल्ने अवसर दिइन्छ। तर यसपालि राहुल गान्धीलाई बोल्न नदिइएको छ, जबकि मन्त्रीलाई बारम्बार अवसर दिइँदैछ।
उनले थपे, संसद हामी सबैको हो। विपक्षलाई पनि आफ्ना कुरा राख्ने अधिकार छ। एउटा पक्षलाई पूर्ण रूपमा रोक्नु लोकतान्त्रिक प्रक्रियाविरुद्ध हो।