गान्ताेक: सिक्किमबाट रायपुर पुगेका १३ सदस्यीय पत्रकार टोलीले बुधवार रायपुरमा भिशाखापटनम आर्थिक कोरिडोरको भ्रमण गरेको छ। परियोजनाले छत्तीसगढ़, ओडिशा र आन्ध्रप्रदेशसँग सडक सम्पर्क र व्यापारलाई मजबुत बनाउने अपेक्षा राखिएको छ।
भारतीय राष्ट्रिय राजमार्ग प्राधिकरणद्वारा निर्माण भइरहेको यस कोरिडोरको १२५ किलोमिटर भाग छत्तीसगढ़ राज्यभित्र पर्नेछ। यो राज्यको पहिलो ६ लेनको पहुँच नियन्त्रित आर्थिक कोरिडोर हुनेछ। सञ्चालनमा आएपछि रायपुर र भिशाखापटनमबीचको यात्रा समय घटेर करिब सात घण्टा मात्र लाग्ने अनुमान गरिएको छ।
निर्माणाधीन कोरिडोरमार्फत छत्तीसगढ़ राज्यमा उत्पादित स्टिल, कोइला तथा अन्य औद्योगिक उत्पादनको निर्यात र आवश्यक वस्तुको आयात सहज हुने राष्ट्रिय राजमार्ग प्राधिकरणका क्षेत्रीय अधिकारी प्रदीप लालले जानकारी दिए। यस कोरिडोरलाई २०२६ भित्र सञ्चालनमा ल्याउने लक्ष्य राखिएको छ।
विशेष रूपमा, यो कोरिडोर बस्तर क्षेत्र हुँदै निर्माण हुँदैछ, जुन एक समय नक्सली प्रभावित क्षेत्र थियो। स्थानीय समुदायलाई विश्वासमा लिएर निर्माण सम्पन्न गर्नु राज्य विकासका लागि महत्वपूर्ण मानिएको छ। यस अघि छत्तीसगढ़को उत्पादन अन्तर्राष्ट्रिय बजारमा सोझो पहुँचमा थिएन, तर कोरिडोरले सोझो सम्पर्क सुनिश्चित गर्नेछ।
त्यस्तै, भ्रमणको क्रममा मिडिया टोलीले मङ्गलवार गेवरामा सञ्चालित दक्षिणपूर्वी कोलफिल्ड्स लिमिटेडको पनि अवलोकन गरेको थियो। कम्पनी भारत सरकारको कोइला मन्त्रालय अन्तर्गत रहेको सहायक संस्था हो। गेवराको खानी विश्वकै दोस्रो ठूलो र एशियाकै सबैभन्दा ठूलो खुल्ला कोइला खानी हो, जसको उत्पादन क्षमता ६० मिलियन मेट्रिक टनभन्दा बढी छ।
भ्रमणका क्रममा पत्रकार टोलीले वातावरणमैत्री उत्खनन, आधुनिक कोइला ढुवानी प्रणाली, जापानी प्रविधिअन्तर्गत बिरुवा रोपण, श्रमिक कल्याण तथा स्थानीय नागरिकका लागि निशुल्क कोइला वितरण जस्ता सामाजिक उत्तरदायित्वसम्बन्धी पहलहरूको जानकारी पनि लिएको थियो। टोलीले विलासपुरस्थित कम्पनीको मुख्यालयको भ्रमण गरी अधिकारीहरूसँग प्रत्यक्ष जानकारी लिएको थियो।
यस भ्रमणले छत्तीसगढ़को आर्थिक विकास र औद्योगिक सम्भावनामा पत्रकारहरूलाई प्रत्यक्ष अवलोकनको अवसर प्रदान गरेको छ।