राभाङ्ला: राबोङमा आज क्षेत्रीय विधायक रिक्सल दोर्जी भोटियाको अध्यक्षतामा समन्वय बैठक सम्पन्न भएको छ। स्थानीय सामुदायिक हलमा आयोजित उक्त बैठकमा राभाङ्ला महकुमाअन्तर्गतका सबै लाइन विभागका प्रतिनिधि, जिल्ला पञ्चायत सदस्य तथा ग्राम पञ्चायत प्रतिनिधिहरूको उपस्थिति रहेको थियो।
बैठकलाई सम्बोधन गर्दै विधायक भोटियाले मुख्यमन्त्री प्रेमसिंह तामाङले अघि सारेको सुनौलो, समृद्ध र समर्थ सिक्किमको दृष्टिकोणलाई तृणमूल स्तरमा अर्थपूर्ण रूपमा कार्यान्वयन गर्न सबै सरोकारवाला निकायबीच समन्वय आवश्यक रहेको बताए। उनले घर–दैलो सम्पर्क र जनतासँगको सहकार्यमा पञ्चायतहरूले खेलेको सक्रिय भूमिकाको प्रशंसा समेत गरे।
बैठकमा पञ्चायत प्रतिनिधिहरूले आ–आफ्नो वडामा सञ्चालन भइरहेका विकासात्मक कार्यक्रम र योजनासम्बन्धी विस्तृत प्रतिवेदन प्रस्तुत गरेका थिए। बैठकले राभाङ्ला महकुमाअन्तर्गत चलिरहेका परियोजना तथा योजनाहरूको अनुगमन, कार्यान्वयनको समीक्षा, तथा जनताप्रति जवाफदेहिता र प्रभावकारी सेवा प्रवाह सुनिश्चित गर्न महत्वपूर्ण मञ्च प्रदान गरेको जनाइएको छ।