गान्तोक: सिक्किमका राज्यपाल ओमप्रकाश माथुरले रामनवमी पर्वको पूर्व सन्ध्यामा आज राजधानीको एमजी मार्गमा आयोजित ध्वज यात्रा (कलश यात्रा, शोभा यात्रा) मा प्रमुख अतिथिको रूपमा भाग लिए।

कार्यक्रममा सिक्किमका मुख्यमन्त्री प्रेमसिंह तामाङ पनि उपस्थित थिए। रामोत्सव समितिका मुख्य संरक्षक तथा मन्त्री सोनाम लामा र अन्य कार्यकारी सदस्यहरूले राज्यपाललाई हार्दिक स्वागत जनाए। यस अवसरमा मन्त्रीहरू, वरिष्ठ अधिकारीहरू, जन प्रतिनिधिहरू र भारी संख्यामा श्रद्धालु उपस्थित थिए, जसको जानकारी लोकभवनले दिएको छ।
राज्यपालले एमजी मार्गमा निकालिएको ध्वज यात्रामा भाग लिँदै रामनवमी उत्सवको शुभकामना दिए। उनले भने, “यस्ता सांस्कृतिक आयोजनाले समाजमा आध्यात्मिक चेतना, सांस्कृतिक एकता र सामाजिक सद्भावलाई बलियो बनाउन महत्वपूर्ण भूमिका निर्वाह गर्छ।”
समारोहको वातावरण जय श्री रामको उद्घोषले भक्तिमय बन्यो। यसै बीच, श्री राम कथा नौ दिवसीय कार्यक्रम २७ मार्चदेखि ४ अप्रिल २०२६ सम्म ठाकुरबाडी मन्दिरमा भव्य रूपमा आयोजना भइरहेको छ।