गान्तोक: मुख्यमन्त्री प्रेमसिंह तामाङले प्रधानमन्त्री नरेन्द्र मोदीलाई भारतमा सबैभन्दा लामो समयसम्म सरकार प्रमुख बन्ने उल्लेखनीय उपलब्धि हासिल गरेकोमा हार्दिक बधाई दिएका छन्।
मुख्यमन्त्री तामाङले आज नयाँ दिल्लीमा प्रधानमन्त्री मोदीसँग शिष्टाचार भेट गरी न्यानो, सौहार्दपूर्ण र अर्थपूर्ण छलफल गरेको मुख्यमन्त्री कार्यालयले जारी गरेको प्रेस विज्ञप्तिमा उल्लेख गरिएको छ।
भेटका क्रममा मुख्यमन्त्रीले सिक्किमका प्रमुख विकास प्राथमिकताहरू र उदीयमान आवश्यकताहरूबारे जानकारी गराउँदै पूर्वाधार विकास, दिगो विकास र जनकल्याणका क्षेत्रमा सहकार्यलाई थप सुदृढ बनाउने विषयमा छलफल गरे।
यस अवसरमा उनले आगामी जुन २०२६ देखि नाथुला पास (सिल्क रुट) पुनः सञ्चालनमा ल्याउने निर्णयका लागि प्रधानमन्त्रीप्रति कृतज्ञता व्यक्त गरे। यस कदमले स्थानीय बासिन्दा र व्यापारिक समुदायलाई महत्वपूर्ण लाभ पुग्ने विश्वास व्यक्त गरिएको छ।

यसबाहेक, मुख्यमन्त्रीले सिक्किम राज्य स्थापनाको स्वर्ण जयन्ती समापन समारोहमा प्रधानमन्त्रीलाई निमन्त्रणा दिएका छन्, जसलाई प्रधानमन्त्रीले स्वीकार गरेको जनाइएको छ। साथै, उनले सिक्किमको दिगो विकास र समृद्धिका लागि भारत सरकारले गर्दै आएको निरन्तर सहयोग, मार्गदर्शन र प्रोत्साहनप्रति आभार व्यक्त गरेका छन्।