पाक्योङ: मुख्यमन्त्री प्रेम सिंह तामाङ–गोलेले आज पाक्योङस्थित थुम्की डाँडा र अम्बा डाँडामा आयोजना गरिएको पहिलो रेनक सिक्किम प्याराग्लाइडिङ एक्युरेसी च्याम्पियनसिप २०२६ को औपचारिक उद्घाटन गरे।
उद्घाटन समारोहमा शिक्षा, खेलकुद तथा युवा मामिला, कानून र संसदीय मामिला विभागका मन्त्री राजु बस्नेत; कृषि, बागवानी, पशुपालन तथा पशु चिकित्सा सेवा र मत्स्य विभागका मन्त्री पूरण गुरुङ; महिला, बालबालिका, ज्येष्ठ नागरिक तथा दिव्याङ्गजन कल्याण विभागका विधायक सह–सल्लाहकार श्रीमती पामिन लेप्चा; सूचना प्रविधि,भूमि राजस्व तथा विपद् व्यवस्थापन विभागका विधायक सह–सल्लाहकार एलबी दास तथा एचसीएम का सल्लाहकार विष्णु कुमार खातीवडा उपस्थित थिए।

यसका साथै पाक्योङ जिल्लाका जिल्ला उपाध्यक्ष, विभिन्न विभागका अध्यक्ष तथा अध्यक्षा, विभाग प्रमुखहरू, पाक्योङका जिल्ला कलेक्टर, वरिष्ठ पुलिस अधीक्षक, मुख्यमन्त्रीका सीए लगायत विभिन्न विभागका अधिकारीहरू र सर्वसाधारण पनि कार्यक्रममा सहभागी थिए।
उद्घाटन समारोहको क्रममा मुख्यमन्त्रीले टेक–अफ स्थलमा ‘सिल्यानास पूजा’ सम्पन्न गरे। जस मार्फत् महोत्सवको सफलता र सुरक्षाका लागि आशीर्वाद मागियो। त्यसपछि स्वस्ति भजनको पाठ गरियो।
यससँगै मुख्यमन्त्रीले ती स्थानहरूमा आधारशिला पट्टिका अनावरण गरे र ग्रामीण तथा रमणीय क्षेत्रहरूमा पर्यटन पूर्वाधार विकासलाई सरकारको प्राथमिकतामा राखिएको बताए।
कार्यक्रमको मुख्य आकर्षणका रूपमा मुख्यमन्त्रीले आधिकारिक रूपमा सहभागीहरूलाई प्याराग्लाइडिङका लागि झण्डा देखाएर बिदाइ गरे र यस क्षेत्रमा साहसिक खेलकुद तथा पर्यावरण–मैत्री पर्यटन प्रवर्द्धनमा जोड दिए।
साथै, मुख्यमन्त्रीले सम्बन्धित अधिकारीहरू तथा प्राविधिक सुपरभाइजरहरूसँग यस साहसिक खेलको प्राविधिक पक्ष, सम्भाव्यता, सुरक्षा मापदण्ड तथा यसबाट दिगो व्यवसाय र रोजगारी सिर्जनाको सम्भावनाबारे छलफल गरे।

यो कार्यक्रम रेनक पर्यटन विकास समाजद्वारा पर्यटन तथा नागरिक उड्डयन विभागको सहकार्यमा आयोजना गरिएको हो। यो पहल मुख्यमन्त्रीको निर्देशनमा अघि बढाइएको हो, जसको उद्देश्य रेनकलाई साहसिक तथा सामुदायिक आधारित पर्यटनको उदीयमान गन्तव्यका रूपमा विकास गर्नु, स्थानीय समुदायका लागि जीविकोपार्जनका अवसर सिर्जना गर्नु र दिगो पर्यटन अभ्यासलाई प्रवर्द्धन गर्नु हो।