झापा: इलामबाट चोरी तस्करी गरी माईखोलामा बगाएर ल्याउँदै गरेको काठ शिवसताक्षीको दोमुखामा बरामद भएको छ। बिहिबार(मई १५)बिहान अन्दाजी २ः३० बजेको समयमा शिवसताक्षी १० दोमुखास्थित माईखोलामा इलामबाट काठ चोरी तस्करी गरी ल्याइरहेको भन्ने खबर प्राप्त हुनसाथ इलाका पुलिस कार्यालय झिलझिले, चुलाचुली सब डिभिजन वन कार्यालय ईलाम र माई सुखानी सब डिभिजन वन कार्यालय ईलामबाट खटिएका वनरक्षक तथा गैंडे सामुदायिक वन उपभोक्ता समिति माईधारको संयुक्त टोलीले अन्दाजी ६० हजार मूल्यबराबरको सखुवा जातको २०/२२ क्युबिक फिट फान्टा बरामद गरेको थियो। तस्करहरुले पुलिसमाथि ढुंगा र गुलेलीले आक्रमण गरेको र पछि थप सुरक्षाकर्मी लगेर काठ नियन्त्रणमा लिइएको इलाका पुलिस कार्यालय झिलझिलेका इन्स्पेक्टर अनिश बुढाथोकीले बताए। बरामद गरिएको काठ गैंडे सामुदायिक वन माईधारमा बुझाइएको छ। यसअघि गत मई 2मा माइखोलामा त्यसरी नै बगाएर ल्याउँदै गरेको चोरीको काठ पुलिसले बरामद गरेको थियो। ट्युबमाथि काठ राखेर माईखोलाको पानीमा बगाएर इलामबाट काठ चोरी गरी झापातर्फ ल्याउने क्रम बढेको छ।