​इम्फाल: मणिपुरमा शान्ति सुरक्षालाई चुस्त बनाउन सुरक्षा बलले विगत २४ घण्टामा सञ्चालन गरेको विशेष अपरेशनका क्रममा ठूलो सफलता हात पारेको छ। राज्यका विभिन्न संवेदनशील क्षेत्रहरूमा गरिएको गहन खोजतलास तथा कारबाहीका क्रममा भारी मात्रामा अवैध हतियार, गोलाबारुद र प्रतिबन्धित नशालु पदार्थ जफत गरिएको छ। अभियानका क्रममा उग्रवादी संगठनका सदस्य, एक म्यानमारका नागरिक र यौन उत्पीडनका आरोपीसहित कयौँ व्यक्तिहरूलाई पक्राउ गरिएको छ।
​मणिपुर पुलिस मुख्यालयले आज जारी गरेको आधिकारिक विवरण अनुसार, इम्फाल पश्चिमको लामदेङबाट प्रतिबन्धित उग्रवादी संगठन यूएनएलएफ (पी) का दुई जना सक्रिय सदस्यहरूलाई हतियारसहित पक्राउ गरिएको छ। पक्राउ पर्नेहरूमा आरामबम टोमटोम (२९) र हेइसनम थॉमस रहेका छन्। उनीहरूको साथबाट एक इन्सास एलएमजी (लाइट मेसिन गन), तीन वटा म्याग्जिन र १४ वटा जिउँदो कारतूस बरामद गरिएको छ।
​यसैगरी, चुराचन्दपुर जिल्लाको सिंगांगट पुलिस थाना क्षेत्र अन्तर्गत पर्ने राष्ट्रिय राजमार्ग १०२ बीबी नजिकैबाट एक म्यानमारका नागरिकसहित दुई जनालाई नियन्त्रणमा लिइएको छ। पक्राउ पर्नेमा म्यानमारको फाइमुल गाउँका निवासी खुप्सियानखाई वुआलनम (३१) र चुराचन्दपुरका दौखानलाल थाङसिङ (३४) रहेका छन्। उनीहरूको साथबाट एक केनबो बाइक र ५५ वटा साबुनदानीमा लुकाएर राखिएको करिब २.१२७ किलोग्राम ब्राउन सुगर जफत गरिएको छ।
​त्यस्तै, इम्फाल पूर्वी जिल्लाको इरिलबुङ पुलिस थाना चेक गेटमा गरिएको चेकिङका क्रममा ३.३ किलोग्राम गाँजासहित याम्बेम सुधीर सिंह उर्फ सदानन्द (२०) र थोङम बिशाल सिंह उर्फ अमुजाओ (२६) लाई पक्राउ गरिएको छ। उनीहरूको साथबाट एक थान स्कुटर, एक थान मोटरसाइकल र दुई वटा मोबाइल बरामद भएको छ। उता भारत-म्यानमार सीमाना नजिकै तेङ्नौपाल जिल्लाको मोरेह थाना क्षेत्रमा सुरक्षा बलले सञ्चालन गरेको सर्च अपरेसनका क्रममा एक एसएलआर राइफल, म्याग्जिनसहित एक ९ एमएम पेस्तोल, चार वटा रेडियो सेट र चार वटा आईईडी (बम) फेला पारेको छ, जसलाई घटनास्थलमै नष्ट गरिएको छ।
​पुलिस सूत्रका अनुसार, प्रतिबन्धित संगठन प्रीपाक (वीसी) गुटका लागि नयाँ युवाहरू भर्ती गर्ने कार्यमा संलग्न मुख्य कार्यकर्ता लैशराम सुरजित मेइतेई उर्फ नानाओ (२९) लाई पनि इम्फाल पूर्वको मन्त्रीपुखरी क्षेत्रबाट पक्राउ गरिएको छ। यसका साथै, इम्फाल पूर्व जिल्लाको महिला थानामा दर्ता भएको यौन उत्पीड़नको मुद्दामा फरार रहेका २६ वर्षीय अभियुक्त सदाफलाई चेकोन अटो पार्किङ क्षेत्रबाट प्रहरीले नियन्त्रणमा लिएको छ। पक्राउ परेका सबै अभियुक्तहरूमाथि प्रहरीले हिरासतमा राखेर थप कानुनी अनुसन्धान अघि बढाएको छ।